За А1 и рекламите на Владата

Марина МаноJловска, Куманово

Поминаа случувањата во А1, па од оваа временска дистанција можеби и трезвено може да се анализира што е она што се случуваше таа ноќ во истоимената ТВ. Се изнагледавме на разни прес-конференции, дебатни емисии, политички аналитичари, експерти, а богами и коментари на колеги - новинари. Она што посебно плаши во целата оваа небулозна акција е желбата на ТВ Сител и Миленко Неделковски од Канал 5 да наметнат мислење дека се работело за државен удар, што за секој нормален човек и интелектуалец е далеку од здрав ум. За опозицијата да изврши државен удар и' е потребен народ, војската и полицијата да бидат на нејзина страна, што гледајќи ги специјалците на МВР, а и обичните полицајци е навистина приказна, која може да се роди само во главите на Латас и на познатиот марсовец Миленко, нормално, во спрега со маркетиншките генијалци на ВМРО-ДПМНЕ. Во емисиите на Сител и на Канал 5 директорот на УЈП и портпаролот на МВР децидно кажаа дека немало наредба за финансиска контрола на А1, туку на фирми со седиште на истата улица, кои траеле веќе два дена, па се прашувам ако е така, зошто полицијата не била повикана наутро во 10 часот или попладне во 13 часот, зошто токму во 19 часот навечер кога повеќето од народот е дома, гледа вести и се спрема за работа наредното утро.

Која беше целта на полициската акција во 19 часот, да им овозможи на инспекторите од УЈП да си ја сработат задачата за која се дојдени или, пак, со упад во просториите на А1 да ја одземат документацијата со која се покажува колку рекламите на Владата се платени, ама и како се платени. Неуспешноста на акцијата, не поради присуството на народот или опозицијата пред А1, туку пред се' на умешноста и итрината на Рамковски, кој претпоставувам дека таква документација не чува во просториите на „Перо Наков“ бб, ја покажаа глупоста на власта. Дека е така, покажа самиот Рамковски во интервју кај Чомовски кога со сета силина на зборот (читај доказите се на сигурно место) удри по власта и начинот како ги поткупувале медиумите во текот на овие четири години, како ги плаќале рекламите за сопствената партија, ама и колку ги плаќале. За да вака се однесува газдата на А1 е само едно објаснување - ВМРО-ДПМНЕ и Никола Груевски не успеаја да дојдат до документите за кои испратија стотина специјалци и полицајци.

Како ќе се одвива приказната натаму, веќе е видено во овие четири години, ќе поднесат кривични пријави, па Апелација ќе го врати на повторно разгледување, па Врховниот суд ќе ја укине пресудата поради немање докази, а во меѓувреме власта ќе најде нова приказна со која ќе ги убедува граѓаните дека се бори против криминалот (ама, никако нема да влезе во „Силекс“ и да направи финансиска контрола на газда Ѕинго, па така е тоа мој народе кога си во власта или со власта!)

Другата страна на медалот е однесувањето на одредени ТВ-куќи и нивните новинари. Како ли ќе се однесуваат утре Сител, ТВ Наша и Канал 5 кога на власт ќе биде СДСМ и не дај Боже на таков начин им влезе во зградите, оти и Ѕинго и бате Борче го имаат истиот шаблон на работа како што го има Рамковски. Оваа можност останува допрва да се види и да се разгледа, се надевам дека тогаш новинарската фела нема толку фер да се однесува како споменативе, секоја им чест!

Ако медалот имаше три страни, тогаш оваа би била третата - криминалот нема боја, религија и националност за да се спречи нема ваши и наши, никој не смее да го краде народот, да го тепа и оневозможува со свој труд да си го чува образот. Ама и народот ќе мора нешто да направи за себе, молчењето не е злато, трпението не е од Бога дадено, тепањето не е од рај излезено, затоа народе, доста молчевме и се храневме со приказните за Александар, тоа се приказни, а оваа што го трпиме е реалност. Држава се гради, држава се брани, држава се има, само ако народот си го цени и почитува сопствениот глас.