Груевски чека да слета во Атина

Премиерот побарал дозвола од Грција за владиниот авион

Тамара Грнчароска
Миркица Поповиќ

Македонија преку своето дипломатско претставништво во Атина, во петокот побарала дозвола за прелетување и за слетување на владиниот авион, со кој македонскиот премиер, Никола Груевски, треба да патува на конференцијата на „Економист“.

И покрај барањето и тврдењата на „Економист“ дека премиерот го потврдил учеството, од македонската Влада велат дека тој се' уште размислува дали да замине за Атина или не. Конференцијата се смета како добра можност за средба меѓу Груевски и Јоргос Папандреу за нови разговори за спорот за името.

Портпаролот на македонската Влада, Мартин Мартиновски, вчера ни изјави дека престојот во Атина би бил добра можност за средба на Груевски и Папандреу, но доколку не дојде до тоа, секогаш постојат други можности за средби.

Тактизирањето на Груевски со патот во Атина се поврзува со немањето што да се каже околу преговорите за името, но и со евентуалното недозволување на грчките власти за прелет и за слетување на македонски авион на грчка територија. Со таков проблем за слетување на грчка територија се соочи македонскиот владин авион, на кој стојат ознаките МКД, минатата година во пресрет на одржувањето на министерската конференција на ОБСЕ на Крф. Тогаш во последен момент грчките власти дозволија слетување на македонскиот авион, но под притисок на ОБСЕ, чии претседавачи беа во тој момент. До вчера грчките официјални лица се' уште немаа издадено дозвола за слетување на македонскиот авион на грчка територија.

Во пресрет на можната повторна средба меѓу македонскиот и грчкиот премиер, портпаролот на грчкото министерство за надворешни работи, Грегорис Делавекурас, изјави дека темата за постигнување конечен договор за името е тема што Грција верува дека може и треба да се реши и за неа таа има направено значајни чекори за да се реши. „За жал, од другата страна веќе 16 години гледаме негативно расположение“, изјави Делавекурас. Според него, во суштина нема преговори, кога другата страна доаѓале и постојано ги повторувале истите ставови. „За соседната држава постои европска и НАТО перспектива, но и покрај тоа државниот врв на нашите соседи одбира да напаѓа“, смета тој, наведувајќи дека Атина нема да ја следи таа реторика и таа логика.

Во врска со тужбата во Хаг, Делавекурас истакна дека според Атина, таа се случила во таков временски период кога повеќе била наменета за домашната јавност, отколку за решавање на суштината на темата. Околу прашањето за идентитетот, тој тврди дека тоа е само уште еден начин да се избегнат преговорите, чија тема е наоѓање решение за името. „Премиерот Груевски се обидува да ги избегне преговорите и во овој обид ги користи сите расположливи средства, а ова им станува јасно на сите вклучени страни“, изјави тој. Според него, се' уште нема најави кога посредникот од ОН, Метју Нимиц, ќе ги повика двете страни за заедничка средба. „Нашата одлука е дека на таа средба треба да се оди добро подготвен и не треба да имаме неуспеси, бидејќи тоа само го отежнува процесот“, смета Далавекурас. Притоа, тој вели дека предлогот „Северна Македонија“ Нимиц го предлагал и порано и ако се размисли логички, ги содржи сите грчки.

Портпаролот на грчкото МНР во интервјуто се осврнува и на македонските односи со Бугарија. „Соседната држава повремено има и несогласувања со Бугарија и тоа е поврзано со политиката што моментално ја следи Скопје“, констатира тој, додавајќи дека нашата земја мора да разбере дека ако сака да влезе во ЕУ, треба да ги решава, а не да создава нови проблеми. „Ако не се соочи со тие проблеми, интегративниот процес ќе биде отежнат и дополнително забавен“, вели Далавекурас.