Претходен број

Владиците си ги мијат рацете од криминалот со „Изгрев“

Судот одреди мерка притвор за девет од 16-те лица кои завчера беа приведени

Гордана Дувњак
Љубиша Станковиќ

Архиепископот Стефан и членови на Синодот на Македонската православна црква не се вмешани во аферата со купопродажбата на хотелот „Изгрев“ заклучиле владиците на вчерашната седница на Синодот посветена на најновите случувања поврзани со апсењата на актерите во овој скандал, кој доби полициско-судски епилог. И покрај тоа што владиците си ги „испраа рацете“, сепак, било побарано од поглаварот на МПЦ и писмено да ги информира за целиот случај. Додека траеше расправата во црковниот врв, во скопскиот Кривичен суд траеше интензивно сослушување на 16 осомничени за аферата „Изгрев“. По повеќе од 24 распити, вчера во Основниот суд - Скопје 1 беше комплетиран распитот на сите осомничени во аферата „Изгрев“. Дури деветмина од 16-те осомничени од вчера попладне се на издржување на мерката притвор. Шестмина од осомничените, односно трите судијки од струшкиот суд, двајца нотари и еден скопски адвокат в натамошниот тек од постапката ќе се бранат од слобода, а за уште еден нема одлука, бидејќи станува збор за лице кое е со нарушена здравствена состојба. Завчера, како што е познато, беа приведени сопствениците на фабриките „Кимико“, браќата Ѓорѓи и Димитар Миладинови, заедно со повеќе нивни соработници, односно вработени, но и судии, нотари и адвокати.

„На синодската седница бевме подетално информирани од архиепископот Стефан околу случајот со хотелот ’Изгрев‘ и, според негови сознанија, тој и членови на Синодот и на Црквата не се вмешани во случајот“, изјави вчера владиката Тимотеј по седницата на Светиот синод на МПЦ.

„Ако имало некој, тој е неовластено вмешан и за него ќе треба да важат законите, бидејќи тие треба да важат и за нас. За сите детали како тоа се случувало треб�� да бидеме писмено запознаени од страна на архиепископот Стефан, кој треба да ни достави писмен извештај. Ако има такво мешање, ќе бидеме отворени за соработка со надлежните органи. Како Синод, немаме ингеренции да ги испитуваме економските зделки“, нагласи владиката Тимотеј.

На новинарското прашање дали ќе се побара одговорност од надлежниот за финансии Димитар Белчовски, како и од секретарот на Скопската епархија Коста Станоевски, затоа што фрлиле дамка врз Црквата, гласноговорникот на МПЦ со став: „Не можеме да тврдиме дека фрлиле дамка врз Црквата. Коста Станоевски не е инволвиран во случајот со ’Изгрев‘, а Димитар Белчовски е потписник на побарувањето само на првиот кредит од еден милион евра и тоа со знаење на архиепископот. Другите зделки се правени без знаење и учество на МПЦ. Надлежните служби нека ја завршат својата работа. Побаравме да бидеме информирани за сите подробности и зависно од тоа ќе видиме дали има место за нечија одговорност. Додека не се сослушаат сите страни, не можеме да судиме“.

Владиката Тимотеј во изјавата за медиумите нагласи и дека браќата Миладинови не информирале никого и работеле на своја рака, па затоа истрагата одела кон нив.

„Кога се избира еден деловен партнер, постои можност и да се згреши. Признавам дека се згрешило во изборот на партнерите. Можно е еден човек во почетокот да биде коректен, а потоа да се смени. Миладинови очигледно биле махери да го направат тоа за што се осомничени, доколку е така како што се тврди. Ако се потврди тоа, тогаш ќе ги раскинеме сите договори што ги имаме со нив“, појасни владиката дебарско-охридски Тимотеј.

За сето она што се случуваше од понеделникот претпладне до вчерашните попладневни часови вчера се огласи претседателката на скопскиот Кривичен суд Добрила Кацарска. Според Кацарска, Јавното обвинителство повело кривична истражна постапка за 16 осомничени во аферата „хотел Изгрев“ и дека за 15 од нив бил побаран притвор.

„Јавниот обвинител изврши прецизирање на барањето, па оттука само за деветмина е одредена мерка притвор. Шест лица, односно судијките Менка Опетчевска, Мими Нанушевска и Светлана Поповска, како и за нотарите Мерсим Положани и Сашо Ѓурчиновски и адвокатката Анита Бегова во иднина ќе се бранат од слобода, со тоа што за двајца од нив беа побарани дополнителни гаранции“, изјави Кацарска, која не даде појаснување што станува со уште едно од осомничените лица за кое неофицијално се дознава е Миодраг Мисајловски. Станува збор за лице кое на полициско-судските органи им стана познат од пред неколку години кога беше отворена аферата „даночна пирамида“.

Во затворот во Шутка од вчера, освен браќата Димитар и Ѓорѓи Миладинови од Струга, сопственици на фирмата „Миладинови ДОО“, се и Гордана Петковска - поранешна управителка на споменатата фирма, Димитрија Голабовски - сопственик на „Агора консалтинг“, Менка Костојчиновска - стечајна управничка на АД „Изгрев“, Сузана Блажевска - референт во струшкиот Катастар, Златко Фармаковски - советник за премер и катастар, адвокатот Димитар Савовски и Борис Андреевски, инаку сопственик на приватни фирми.

Од извори блиски на истрагата дознаваме дека постапката течела со кратки паузи и дека без малку сите осомничени давале одбрана. Од истите извори дознаваме дека осомничените судијки одбивале правна помош, но дека по сугестија на истражната судијка, им бил одреден бранител по службена должност. Сите приведени се осомничени за малверзации кои се поврзани со струшкиот хотел „Изгрев“.