ИВЗ не се откажува од нелегалната џамија

На Бехаџудин Шехапи, директор на Националниот конзерваторски центар, му порачаа „да не го пика носот во скопските џамии“

Билјана Јовановска

Исламската верска заедница нема намера да се откаже од возобновувањето на Араста-џамијата во Старата скопска чаршија. По жестоките напади на Владата, сега најавува и други конкретни чекори кои можат да ги зголемат меѓуетничките тензии. На прес-конференција ја информираа јавноста и своите верници „дека се премногу горди што го поставија камен-темелникот на џамијата“ наспроти оспорувањата што доаѓаат од Националниот конзерваторски центар, кој тврди дека станува збор за дивоградба. Покрај тоа, порачаа дека Скопското муфтиство „ќе го стори максимумот не само за возобновување на Араста-џамијата, туку и за другите објекти и имоти што гравитираат на негова територија за побрзо да се вратат во сопственост на ИВЗ“. Ова, всушност, е своевиден одговор на владиниот закон со кој Старата чаршија доби третман на заштитена зона, со кој Заедницата се почувствува оштетена за своите имоти – Капан-ан, Сули-ан, Безистен, Детскиот театар и десетина дуќани што ќе останат во сопственост на државата.

На вчерашната прес-конференција, ИВЗ посебно со критики се нафрли врз директорот на Националниот конзерваторски центар, Бехаџудин Шехапи, кој предупреди дека немаат дозвола да градат на земјиштето на кое се возобновува џамијата, бидејќи станува збор за археолошки локалитет. Таму, како што рече Шехапи, булдожерите направиле непроценлива штета оти го урнале подот на џамијата, кој има голема историска и културна вредност, зашто датира од 15 и 17 век.

Но, наместо да запре со нелегалните активности, Исламската верска заедница соопшти дека „Шехапи нема право, од правен и од морален аспект, да говори за возобновување на Араста-џамијата, затоа што таа била урната во земјотресот, а според Законот за градба (член 65) не е неопходно обезбедување дозвола за градба“. Му забележуваат и зошто не се огласил за незаконските активности што беа изведени во Јахја-паша џамијата, Михработ на Камениот мост и за Законот за ревитализација на Старата чаршија.

Во писменото соопштение од ИВЗ, Шехапи грубо се обвинува дека „во 2003 година неправедно ја ограби хуманитарната организација ’Ел Хилал‘, која ја основа ИВЗ во 1987 година и оттогаш нема морал да говори за нешто што се однесува на заштитата и заживувањето на верските објекти“. Наедно, соопштија дека Шехапи „не е компетентен да обезбеди донации“, а Скопското муфтиство директно му порача „да не го пика носот во скопските џамии, да остане на местото на кое е и да придонесува во дискриминацијата над ИВЗ и муслиманите во Македонија, иако е припадник на исламот“.

Директорот на Националниот конзерваторски центар, Бехаџудин Шехапи, одби да ги коментира обвинувањата, со објаснување дека „се ниски и смешни“. Но, што се однесува до Араста-џамијата, останува доследен на ставот дека „ИВЗ направи незаконски чин со уривањето на подот и дека нивниот проект за возобновување не помина ниту една стручна инстанција“. Прозваниот Шехапи укажува дека вакви импровизации се особено недозволиви кога се работи за Старата чаршија, но смета дека „во ИВЗ има мудри глави кои ќе покажат подготвеност да соработуваат со институциите на власта, односно со Центарот, кој го има проектот за Араста-џамијата што ја поминал законската процедура“.

Националниот конзерваторски центар, тврди директорот, ќе стори се' да се изгради Араста-џамијата, урната во земјотресот, но согласно со проектот изготвен од компетентна институција и во согласност со Законот за културно наследство и со Програмата за ревитализација на Старата чаршија. Шехапи нагласува дека проектот е „од исклучително значење, бидејќи не се гради во некое село, туку во старото градско јадро, а она што го нуди ИВЗ е новоградба, архитектура која содржи имитации на многу објекти и нема допирни точки со автентичноста на Араста-џамијата“.