Градот и Чаир ќе градат натпатник на Бит-пазар
Изградба на натпатник на Бит-пазар, уредување на партерниот влез во Старата скопска чаршија кај Даут-пашиниот амам, партерно уредување на тротоарите на т.н. пластичарска улица се само дел од проектите што ги договориле Општина Чаир и Градот. Чаир деновиве ќе побара од Градот ново сообраќајно решение за Бит-пазар за да може непречено да започне изградбата на натпатникот на булеварот „Крсте Мисирков“ кон пазарот, со што ќе се реши безбедноста на пешаците. На средба претставници на Градот и градоначалникот на Чаир, Изет Меџити, било договорено веднаш да почнат и активностите за уредување на платото во Старата скопска чаршија со нови травертински плочки, кои подоцна со поставување хидроулични столпчиња ќе се заштитат од несовесните возачи.
Во рамките на сите овие зафати е испланирана и реконструкција на тротоарите на булеварот „Втора македонско-косовска бригада“, а градските власти ќе постават штедливи светилки. (Сн.К.) |
