Претходен број

Самоволието на УО ги избркало Швајцарците од Пелистер

ДЗР констатира дека УО незаконски разрешувал и именувал директори

БИТОЛА - „Швајцарскиот грант од милион евра наменет за Пелистер пропадна поради самоволието на Управниот одбор на Националниот парк ’Пелистер‘. УО се дрзнал, надвор од законот, да разрешува и избира директори на установата“. Ова го открива Државниот завод за ревизија во вчера објавениот извештај за финансиското работење на паркот „Пелистер“ минатата година.

Контролорите на јавните пари јасно потенцираат дека констатирале неправилности во постапката за разрешување на поранешниот директор Славко Дамевски, кој од позицијата прв човек беше тргнат на 3 септември 2007 година. Пречекорување ингеренции во постапката направил Управниот одбор на институцијата на чие чело е Томислав Новакович.

„Управниот одбор има право да и' предлага на Владата разрешување на работодавниот орган, но не и да го разрешува. УО ја направил процедурата според препораките на Владата, спровел оглас, но немал право да изврши разрешување на актуелниот директор, се' додека не биде добиено решение од Владата. Тоа е пречекорување на ингеренциите на УО“, заклучува ДЗР.

И самите Швајцарци пред овластениот државен ревизор обелодениле дека една од причините за прекинувањето на соработката со НП „Пелистер“ е промената на Дамевски, иако во времето кога пукна скандалот не сакаа да го коментираат овој детаљ. Официјално соработката е прекината, но за парите кои странците ги пренеле на сметката на институцијата се' уште не биле направени финансиски извештаи.

Во нивното образложение за Швајцарците јасно стои дека постојат три причини за заминувањето од Пелистер. И тоа, ненавремената промена на директорот, спротивно на законските прописи, неизвршената стручна измена на УО во кој, според договорот со донаторот, два члена требало да бидат по предлог на Министерството за животна средина, што не е реализирано. И како последна причина спорна за странците бил неусвоениот закон за странски инвестиции во екологијата, за што Владата имала положено гаранции.

За пречекорените ингеренции ревизорите им порачуваат на членовите на УО на паркот да ги почитуваат одредбите од Статутот на установата во однос на изборот и разрешувањето директори и да не преземаат мерки и задачи за кои не постои законска поддршка.

Инаку, и по неколку месеци од најавите на Министерство��о за екологија дека двата члена во УО Новакович и Николина Ристевска не се соодветни и треба да бидат поставени луѓе компетентни од ресорот, тоа не се случи. Паркот доби нов директор, Сашо Мицевски, кој не успеа да ги разубеди Швајцарците да ја вратат донацијата од близу милион евра наменета за Пелистер. (Д.Р.)