Охрид летово ќе остане полупразен?

Туристи се привлекуваат со пониски цени и со збогатена понуда

Симон Илиевски

ОХРИД - Годинешната сезона е речиси на прагот, а кај туристичките работници владее страв за нејзината успешност. Ниските цени за летување што ги нудат земјите од соседството се сериозно предупредување за туристичките работници во Охрид навреме да реагираат и да се коригираат. Тоа значи пониски цени на аранжманите и збогатена понуда што ќе привлече туристи. Доколку не се направи тоа навреме, можно е Охрид и летово да остане полупразен.

Уште отсега има индиции дека најголемиот туристички центар во Македонија оваа сезона ќе има посна жетва. Во поголемите хотелски капацитети што нудат цени од 25 до 60 евра за полупансион засега се резервирани од 20 до 50 отсто од местата. Меѓутоа, загрижуваат податоците, според кои, за поголемиот дел ангажмани аконтациите не се платени. Ретки се примерите кога туроператорите, особено странските, закупуваат по моделот полно за празно, односно го прифаќаат ризикот сами да ги пополнат сместувачките капацитети.

Навистина локалната туристичка заедница прави напори за намалување на цените. Но, тоа се' уште е срамежливо и без голема медиумска кампања, која ќе допре до потенцијалните странски туристи, особено во земјите од регионот.

„Постојано ги притискаме хотелиерите и сопствениците на апартмани во Охрид навреме да ги намалат цените на аранжманите. Не можеме директно да влијаеме зашто тие се приватен сектор, но многупати се покажа дека сме имале право“, вели градоначалникот на Охрид, Александар Петрески.

Практиката за навремено договарање на цените се покажа успешна со израелските и со холандските туристи што доаѓаат пред и по главната туристичка сезона. „Хотелиерите се расположени за преговори и за намалување на цените. Но, мора да се потенцира дека се' уште најголемиот проблем се високите цени на авиопревозот. Тоа ја зголемува цената на целосниот тур��стички аранжман“, објаснува Дончо Таневски, претседател на Здружението на хотелиери.

Локалната самоуправа понуди да субвенционира дел од цената на билетот за воведување редовни и чартер-линии од Белград, Загреб, Љубљана и од поголемите европски градови. Овој процес, велат во општината, бавно се реализира, а во авиобизнисот во Македонија се' уште не влегле нискобуџетски компании.

Охридскиот туризам, за жал, и годинава е без сериозна стратегија. Неизвесно е дали ќе има повеќе гости од лани. Туристичките работници се надеваат дека состојбата во Охрид може да се подобри со доаѓањето на домашните гости, кои од разни причини, (неизваден биометриски пасош) не ќе можат да заминат во странство.