Претходен број

Партиски препукувања околу судството

ВМРО-ДПМНЕ и СДСМ се конфронтираа околу тоа чие влијание и притисоци биле поголеми врз третата власт

Жестоките напади врз судството што почнаа по објавувањето на првостепената пресуда за експремиерот Владо Бучковски викендов прераснаа во фронтален напад меѓу двете најголеми партии во државата, кои меѓусебно се обвинуваа за притисоци и влијанија.

По петочната изјава на в.д. лидерот на СДСМ, Зоран Заев. кој рече дека „сите монтирани политички случаи од страна на власта против своите неистомисленици ќе се препрочитаат и ќе се преиспита дали има злоупотреби од страна на оние кои, наместо да делат правда, делеле партиски пресуди“, владејачката партија викендов одговори со контранапад. Портпаролот на ВМРО-ДПМНЕ, Александар Бичиклиски, на прес-конференција ги оцени заканите на Зоран Заев како скандалозни.

„Милионерот Зоран Заев, кој беше аболиран од својот политички ментор Бранко Црвенковски, со изјавите за закани врз судиите го урива демократскиот систем во Република Македонија, не' враќа во времето на комунизмот и не' оддалечува од европските перспективи“, изјави Бичиклиски.

Тој го праша Заев на кој начин ќе ги оствари заканите кон судиите и зошто упорно продолжуваат да се спротивставуваат на судските пресуди за криминал.

„Единствените кои се појавија во јавноста да го заштитат Бучковски и да го оправдаат фактот дека Владо Бучковски, како што стои во пресудата, проневерил 2,5 милиони евра за набавка на резервни делови за тенковите, се неговите пријатели од СДСМ, односно истите тие кои ја изработија аболицијата за Зоран Заев, осомничен за криминал тежок близу осум милиони евра. Истите тие кои ги направија криминалните приватизации, истите тие кои ги толерираа Бајруш, криминалот на патарините, корупцијата во институциите, шверцот со цигари и нафта“, рече Бичиклиски.

На ова следуваше реакција од СДСМ, која оцени дека е „срамно и крајно несериозно владејачката партија да говори и да ја обвинува опозицијата за притисоци и закани врз судството“. Според оваа опозициска партија, скандал се фамилијарните врски на ВМРО-ДПМНЕ со судството. Во врска со Бајруш Сејдиу, осомничен во акцијата „Пепел“, СДСМ во реакцијата наведува оти очекува на следната прес-конференција ВМРО-ДПМНЕ да одговори дали е тој истиот Бајруш Сејдиу, на кого на 7 мај 2007 година, по повод Денот на безбедноста, МВР му врачи благодарница за успешна соработка.

ВМРО-ДПМНЕ не остана на претходната реакција, туку возврати со нова, во која го повика „СДСМ да престане со лагите“.

Според ВМРО-ДПМНЕ, СДСМ не треба да кажува за поставеноста на судството, затоа што, како што се наведува во соопштението, 95 отсто од судиите се назначени во време кога на власт била СДСМ.

Во партиските препукувања се вмеша и Коалицијата на невладини организации „Право и правна држава“, која апелираше до сите политички партии во државата да се воздржат од упатување критики кон судската власт во Македонија. (Г.Д.)