Жестоко меѓу Фијат Цаноски и градоначалникот на Гази Баба

Газдата на „Космос“ упати апел за јавна дебата, градоначаникот Тони Трајковски ја одби

Љубиша Станковиќ

Инвеститорот на комплексот „Космос“, пратеникот Фијат Цаноски упати повик за јавно соочување до градоначалникот на Гази Баба, Тони Трајковски, но тој вчера го одби барањето за дебатирање.

„Не гледам причина за некакви јавни дебати на кои ме повикувате, кога Вие ги одбегнавте сите форми на институционален дијалог, не не' известувавте како орган за Вашата работа, иако имавте обврска, одбивате да примите официјални акти за комуникација и работевте спротивно на законите“, рече тој во одговорот до Цаноски.

Градоначалникот Трајковски не гледа рационална причина за дебата која ќе се одвива надвор од институциите, затоа што таква форма на комуникација ќе го симнела, вели, нивото на општествена дебата. Таквата една дебата за градоначалникот претставува „непотребен драматуршки ефект“ кој не носи ништо продуктивно, туку напротив е беспредметна затоа што нема институционална поткрепа ниту ефект.

Градоначалникот на Гази Баба, Тони Трајковски го потсетува сопственикот на фирмата инвеститор, Фијат Цаноски, дека обезбедување на владеењето на правото, дијалогот и општественото комуницирање меѓу субјектите и почитувањето на општествените норми и законите во демократск��те земји, се одвива низ институциите на системот, но и тоа дека законите во државава важат за секого без разлика дали е обичен граѓанин или богат бизнисмен. На крајот од одговорот кој што градоначаникот му го упатува на Цаноски има и потсетување дека тој како човек кој ја добил довербата од граѓаните има обврска да обезбеди почитување на законот.

Преписката на Трајковски со пратеникот Цаноски доаѓа по отвореното писмо кое што сопственикот на станбено деловниот комплекс „Космос“ го упати не само до него, туку и до градоначаникот на Скопје и до министерот за транспорт и врски. Цаноски го обвини градоначалникот на Гази Баба дека изнесува невистини и манипулира со јавноста, бидејќи тој како инвеститор, преку неговата компанија “Фине“, работи во склад со законските происи.

„Јас, како основач на инвестициската фирма „Фине”, Ве повикувам, каде и кога сакате, во нашата компанија, во Општината, во присуство на вашите инспектори и на јавноста, или во кој било медиум кој што Вие ќе го изберете, да ги соочиме нашите факти за кои тврдиме дека се законски основани. Сакаме да Ве увериме дека сте во голема заблуда и дека е невистина кога тврдите дека има големи отстапувања од основниот проект,“ вели Цаноски во своето отворено писмо.

Фијат Цаноски го потсетува градоначалникот дека неговата компанија работи во согласност со сите позитивни прописи и дека во ниту еден момент ги нема прекршено заковите во државава. Цаноски се повикува на Решението за локациски услови, на Протоколот за регулациона, градежна и нивелациона линија и на Одобрението за градба, а за кои вели дека се потпишани лично од градоначалникот Тони Трајковски.

Повикувајќи се токму на Протоколот, пратеникот Цаноски презентира доказ, поточно делот кој се однесува на котата на хоризонт во кој никаде не е наведено колкава треба да е котата на теренот, висината на заштитениот тротоар и котата на првата плоча.

Цаноски смета дека во секоја демократска држава инвеститор каков што е тој самиот, со вложување од 60 милиони евра, ќе бил поддржан од секоја администрација само Гази Баба е подготвена да урне таков еден објект и притоа да одбие барање за измени на основниот план, а згора на се' и да поднесе кривична пријава.

Градоначалникот Трајковски за инвестиротрот Цаноски најави кривична пријава, а Цаноски, пак, против него и против неговите соработници исто така поднесе кривични пријави,а најави и судски процес во судот во Стразбур.

Катерина Цаневска- Арсовска портпарол на Цаноски

Новинарката Катерина Цаневска-Арсовска, која до неодамна работеше во А1 телевизија, стана портпаролка на Фијат Цаноски. Таа вчера упати апел за средба на Цаноски со градоначалникот Тони Трајковски.