„Космос“ го активира опозицискиот фронт

Што може да му понуди СДСМ на Фијат Цаноски откако не им успеа спасувањето на А1?

Светлана Унковска

Лидерите на СДСМ Бранко Црвенковски и на Партијата за европска иднина (ПЕИ) на Фијат Цаноски организираат средба на поширокиот опозициски фронт. Тоа ќе биде прва средба по изборите, а повод се случувањата околу уривањето на зградата „Космос“ во сопственост на Цаноски.

Во јавноста веќе се појавија критики дека опозицијата долго чека на реакција во врска со турбулентните случувања што почнаа веќе еден ден по изборите, со апсењето на Љубе Бошкоски.

Друштвото што ќе седне на маса, како што е најавено, во вторник, е во помалку или повеќе познат состав. Покрај Црвенковски и Цаноски, тука ќе бидат и Тито Петковски од Нова Социјалдемократска партија, Ивон Величковски од Либерална партија, водачите на неколку помали партии со етнички предзнак и уште неколку претседатели на мали партии.

Црвенковски, кој минатиот викенд даде интервју за нашиот весник, изјави дека СДСМ односно тој како лидер на опозицијата, не ги предизвикале предвремените избори туку дека тие се случиле заради политичката калкулација на Груевски. Таквата изјава на Црвенковски наиде на саркастични реакции дури и во редовите на СДСМ, а од неговиот некогашен близок соработник Владо Бучковски пристигна и обвинувањето дека со таквото бегање од вистината Црвенковски бара алиби за неуспехот на изборите.

„Ме зачуди изјавата на Црвенковски дека СДСМ не била иницијатор на предвремените избори. Истото го кажа и на последниот Конгрес на партијата што условно речено требаше да биде негов говор кој требаше да го покрие неуспехот“, рече Бучковски. Тој додава дека целата операција за иницирање предвремени избори започнала уште на опозицискиот митинг пред Владата во јуни минатата година за барањата за предвремени избори да доживеат кулминација на декемврискиот марш на опозицијата.

„Не ми е јасно и не можам да сфатам зошто на тој начин продолжува тенденцијата да се релативизираат причините. Јас искрено, од она што го гледам во нашето опкружување па и пошироко, не памтам дека некој побарал предвремени избори а потоа да ги изгубил“, критикува Бучковски.

Што може да му понуди сега СДСМ на Фијат Цаноски кој несомнено се најде на мета на Владата за што Цаноски, кој е некогашен коалициски партнер на Груевски, вели дека е заради неговото преминување во опозициските редови. Самиот Цаноски неодамна изјави дека ќе побара веднаш по летната ферија да се состане парламентот и пратениците да расправаат за потегот на Владата за уривање на „Космос“ за кој Цаноски тврди дека е одмазднички чин заради неговото политичко дејствување.

Дали опозицијата можеби ќе договори некакво есенско сценарио за притисок врз Владата која ги засили своите позиции на вонредните парламентарни избори во јуни? И во каква кондиција се наоѓа Црвенковски по поразот што неволно го призна а според некои посматрачи дури се обиде и да го негира со цел да остане на чело на СДСМ?

Чудни работи се случуваат зад кулисите на политичката сцена, а она што изненадува се нападите што ненадејно дојдоа од кругови на невладиниот сектор од тн. лева страна, кои се изненадување ако се знае дека социјалдемократите добро кохабитираат со таа сфера. Најпрвин, на социјалната мрежа Фејсбук експлодираше незадоволство на цивилниот сектор од изјавата на Црвенковски (во интервјуто за нашиот весник) дека ги повикува сите политички и граѓански сили против Владата, што е протолкувана како дадена потерница во рацете на Груевски за прогон на луѓе од цивилниот сектор.

Лидија Димова од невладината Центар за европско образование кој е огранок на Фондацијата отворено општество предводена од Владимир Милчин вели дека Црвенковски работи на прикривање на сопствените грешки, оставајќи го членството на бришан простор.

„Видете што се случува во последните недели кога власта удира по секој оној кој го смета за непријател. А што прави опозицијата, па каде се? Чека сто дена од Владата!? Мене лично ми е нејасно што е тоа што Црвенковски не може да го направи како член на партијата, па мора да биде претседател на СДСМ? Ако е целта да се привлечат што повеќе од неопределените гласачи мора да биде јасно дека тоа не може да се направи со Бранко на чело“, рече Димова.

Негодувањето против Црвенковски не може да се земе како сигурен индикатор дека расправата за поразот на изборите не е завршена, но сосема сигурно се наѕираат пукнатини во опозицискиот блок. „Космос“ може да ја зацврсти кохезијата но доколку неговата судбина стане идентична на судбината на А1 телевизија, тогаш ќе се доведе во прашање и целата политичка стратегија на опозицијата.