Поглед

ПАП-реклама

Јасмина Јовановска

Со двегодишната реклама за ПАП-тест, заврши и превентивата за жените еднаш годишно бесплатно да одат на гинеколошки преглед. Сега,државата ќе дава пари жените да прават бесплатен ПАП-тест секоја четврта година. Ако жените сакаат порано да се проверат, ќе мора да платат од свој џеб, партиципација или целосен преглед.

И со кампањата за бесплатен ПАП-тест не беа опфатени тие за кои беше наменета - неосигурените жени. Многу не помогна ни тоа што ПАП-тестот беше бесплатен. Ако бесплатната акција не помогна да ја пробуди свеста кај жените за ракот на матката, како тогаш државата сега кога се плаќа, да ги натера жените да се појават во гинеколошките ординации.Додека траеше акцијата на сите страни, се трубеше колку е важно да се прави еднаш годишно ПАП-тест. За да дојдат на преглед, жените се заплашуваа дека ракот на грлото на матката коси. Се' беше наменски, требаше да се потрошат парите и да се покаже колку е успешна акцијата и дека Владата нешто работи и во сферата на заштита на жената.

Но, ракот коси и сега, а жените на бесплатен тест може само на секоја четврта година. Како тогаш државата планира жените да ги заштити од ракот на репродуктивните органи. Дали и во превентивата, Владата најде начин за нејзината популистичка политика?

Здравствените власти се правдаат дека бесплатниот ПАП-тест еднаш годишно не е медицински издржан. Зошто тогаш на жените не им беше речено дека ова е кампања, и во нормални услови не треба толку често да се прегледуваат. Министерството за здравство се повикува на препораката СЗО дека ПАП-тест треба да се прави на четири години. Па, СЗО и за многу други работи препорачува, па не ја слушаме секогаш. Зошто мора и сега. Или снема пари, па сега ќе се повикуваме на СЗО.