Самобендисаните од Б1 телевизија

Нина Нинеска-Фиданоска

Чудно им е на ценетите новинарски имиња од А1 зошто сите ние во таа очајна ноќ не се испотепавме да влеземе во нивното отворено студио и таму бескомпромисно да не' втурнат во онаа перверзија од наводна дебата, со која ги удавија недолжните гледачи

Во парадата што деновиве прилично невкусно и без секакво чувство за пристојно дозирање ни ја приредуваше тимот на А1 телевизија, во серијата креативни проблесоци слушнавме и поплаки дека колегите од другите медиуми во Македонија не се солидаризирале со нив во битката за заштита на нивните новинарски слободи. А замислете, наспроти неблагодарните и неколегијални македонски новинари, од сите други добивале максимална поддршка и разбирање, и од Балканот, па и пошироко од Европа.

И така сите ние, во мал милион прилози што одеа на телевизијата А1, но и во личните контакти, прилично нервозно бевме прозивани оти не сме сакале да застанеме на нивна страна, а која за нив има знак на равенство со слободното и независното новинарство.

Не им е јасно на драгите колеги од медиумот, кој деновиве стигнаа и да си го прогласат за „единствениот столб на македонската демократија“, зошто другите новинари не потрчаа како хипнотизирани да „гинат“ за нив пред налетите на даночниците и на полицајците. Чудно им е на овие ценети новинарски имиња зошто сите ние во таа очајна ноќ не се испотепавме да влеземе во нивното отворено студио и таму бескомпромисно да не' втурнат во онаа перверзија од наводна дебата, со која ги удавија недолжните гледачи. Не можат да разберат овие величини зошто не сакавме да се стопиме со ликовите што продефилираа таа вечер на програмата на А1, а кои, секоја чест на неколкуте исклучоци со искрени намери, беа таму за се' друго, само не за да го бранат независното македонско новинарство.

И пред да им одговорам на колегите од Б1 телевизија, се извинувам погрешив, беше А1, зошто изостана реакцијата што тие сосема сигурно ја очекуваа, само накусо ќе прецизирам дека јас осудувам секаков вид притисок врз слободниот новинарски збор. И сметам дека воопшто не беше потребно таму да упадне цел кордон полицајци за да им асистираат на инспекторите во претресот на деловните книги на сомнителните компании. И јавно извикувам дека никој, ама баш никој во оваа земја не смее да тепа новинари, а дека ако некој тепал, треба веднаш да биде санкциониран. Ние сосема прецизно го презентиравме тоа во сите наши текстови, коментари и анализи што беа посветени на случувањата во телевизијата. Зарем не е тоа поддршка за новинарите и за нивните права и слободи? Што уште требаше да направиме, ве молам?

И конечно, но не и помалку важно, и мене ми е кристално јасно дека ваквата драматична акција на власта за гонење на финансиските дубари ќе беше далеку побезболна или можеби воопшто немаше да постои, ако А1 сериозно не му „брцнеше“ в око на премиерот Никола Груевски.

Но, тоа е веќе констатирана работа. Сега да се вратам на пораката што сакам да ја пренесам до овие „неприкосновени“ перјаници, кои деновиве на сите страни раскажуваат колку биле разочарани од нашиот студен однос кон нивната болка.

Знаете ли зошто, мои почитувани колеги од Б1, пак се извинувам, беше А1, не наседнавме на вашите играрии како што вие се надевавте? Прво и основно, затоа што и ние, како и сите чесни граѓани во оваа земја, сакаме да функционира правната држава за сите еднакво, па дури и за вашиот недопирлив газда, кој долги години наназад, опиен од моќта што му ја даваше етаблираниот медиум, мислеше дека ќе може бесконечно да уценува компании, да жигосува личности, да се заканува на политичари... И не сакам да прејудицирам како ќе заврши оваа истрага, само силно ќе апелирам до институциите да останат на нивото на задачата што си ја зададоа и целосно да расчистат со последната трошка сомнеж за какви било малверзации што Рамковски или нему блиски можеби ги правеле во ова прочуено бизнис-царство. Тие нека си докажуваат чии се вреќите со „кеш“ што беа изнесени од „Перо Наков“ б.б. И кој и зошто имал мотив да прелева милиони евра надвор од земјава.

Овде, сепак, морам јавно да се оградам од стилот и манирот со кој деновиве се покрива овој скандал во некои од провладините медиуми.

Но, за жал, има и еден друг мотив, респектирани колеги од А1, зошто и ние не дојдовме да гориме во огнот заедно со вас. Низок е можеби тој мотив, признавам, но еве јас ќе се дрзнам и јавно ќе го соопштам, иако верувам дека потајно го поч��вствувале многумина од нашата напатена новинарска фела. А тоа е што веќе ни дојде преку глава од вашата самобендисаност и наперченост, вашиот став дека „новинарството во Македонија почнува и завршува со вас и со вашиот наводен надвселенски професионализам“. А знаеме сите добро како се негуваше професионализмот во А1 во последниов период. Многу поинаква песна се пееше во вашата телевизија не така одамна кога бевте во „добрите“ со Владата, кога требаше да се билда нејзиниот рејтинг и кога имавте поинаква мисија од сегашната. Знам дека со овие мои зборови ќе го навлечам гневот на оние навистина коректни, одмерени и честити новинари во А1, какви што, за среќа, секогаш постоеле и постојат во телевизијата. И веднаш да им се извинам ако на каков било начин ги навредив, обидувајќи се да ја доловам генералната слика што за кадарот на А1 веќе одамна е креирана меѓу новинарскиот еснаф, а за што директно се одговорни замислените ѕвезди и самодоживеани величини од телевизијата.

Сте се запрашале ли некогаш кога вие сте биле солидарни со новинарите од другите медиуми? Дали вие сте ги бранеле од нападите ��то ги доживувале, ама онака искрено, а не испровоцирано од некаков ситен дневен интерес. Тешко дека ќе се сетите на такви моменти, бидејќи во најголемиот дел од времето, за жал, вие се занимавате со самите себе.

За жал, и јас настрадав, ни крива ни должна, од копјата што ги исфрлија деновиве токму вашите квазипрофесионалци, во одбрана на својот наводно загрозен медиумски простор. И воопшто не се лутам што погрешија и што колегата Ерол Ризаов го претставија како главен и одговорен на „Утрински весник“, иако тој не ја извршува таа функција веќе три години. Па боже мој, луѓе сме и грешки правиме, иако ме чуди како овие „врвни“ медиумски играчи покажуваат толкави количества незнаење и неинформираност. И се прашувам зошто изјавата на Ерол ја злоупотребија, земајќи си го само делот кој ним им ��дговара, а намерно заборавајќи да ги пуштат неговите критики за вашиот газда.

Меѓутоа, големите луѓе кога грешат, имаат доблест веднаш да се извинат. Секако, оваа девиза ни најмалку не важи за Младен Чадиковски, кој прво не сакаше во ударните вести да го објави извинувањето, а по сериозните реакции, го направи тоа крајно срамно и ниско, инструирајќи го уредникот на вестите со половина уста да прочита само и единствено дека Ризаов не бил главен на „Утрински“. И толку. Кој ја „шиша“ новата главна уредничка што била навредена, која е пак сега таа ние нејзе да и' се извинуваме, веројатно си помислил Младен, додавајќи си оти тој сега има да решава поважни „државнички“ проблеми. Тоа е оној добро препознатлив стил на однесување на овие нападни момчиња за кој пред малку пишував - тие мислат дек�� смеат и да критикуваат, и да прават материјални грешки, па дури и да навредуваат, и никогаш за тоа да не се преиспитаат. Но, не дај боже нив некој да ги чепне, тогаш се прават драми до бесвест пред целата македонска јавност.