Претходен број

Тенорот Благој Нацоски го разврза „македонскиот јазол“ со новинарот на РАИ

Новинарот ме вадеше од кожа со своите непристојни коментари, вели Нацоски за написите на новинар на РАИ

Енио Ремондино, новинар на угледната и моќна италијанска државна телевизија РАИ и повремен дописник од Балканот, кој поради сопствено незнаење во репортерските записи Македонците ги нарекувал „Славобугари“, по средбата со нашиот оперски пејач Благој Нацоски, не само што го сменил ваквиот начин на непристојно известување туку и во својот текст насловен како „Јазолот на македонската нација, приказна што се' уште раскарува“ признава дека направил „огромна грешка со Македонците Славобугари“ и ветува дека подобро ќе ја проучи историјата.

Македонскиот тенор Нацоски случајно го сретнал Ремондино во авион патувајќи од Скопје кон Рим и кога го забележал, не можел да се воздржи и да не му се обрати.

„Она што му го реков е дека не треба во своите извештаи да не' нарекува ни Бугари ни Словени, туку едноставно Македонци. Му реков да се повика на последниот попис на населението во Македонија за да види колку Македонци има во Македонија, а потоа да провери колку Македонци што го говорат истиот јазик има и во Грција и во Бугарија. Му реков да се информира и за Букурешкиот договор од 1913 година, а кој тој воопшто и не го знаеше. Му кажав за првото заседание на АСНОМ и за многу примери за македонската национална свест уште во 18 и 19 век. Новинарот ме вадеше од кожа со своите непристојни коментари. Иницирав и петиција меѓу Македонците што живеат во Рим. Кога го видов во авионот, не можев да не му се обратам“, изјави за „Утрински весник“ врвниот македонски тенор со светско реноме Благој Нацоски, кој живее и работи во Италија.

„Тој внимателно ме ислуша и не се противеше, туку напротив, ми побара материјал, односно книги каде што може да прочита за Македонија. Веќе му подготвив листа на книги за Македонија, а тој во својот напис вели дека ми ветил дека ќе се информира за Александар Велики и за Аристотел. Тој, всушност, ми вети дека ќе се информира за Македонија, а не ги спомена нив“, со што Нацоски потврдува дека италијанскиот новинар и навистина се информирал за Македонија.

Ваквата тет-а-тет средба или, како што ја нарекува Нацоски, дипломатска акција „човек на човек“ резултираше со репортерски запис на новинарот Ремондино во кој се опишува неговото воодушевување од средбата и разговорот, како што и самиот го нарекува, со „идниот Павароти од Македонија“.

Вака пишуваше во својот текст Енио Ремондино:

„Директен лет од Скопје кон Рим. Муабет со патник седнат до мене, инаку сонародник. Потоа средба-судир со патникот седнат во редот пред мене.

’Вие сте новинарот Ремондино?‘

Веднаш се прашувам дали ќе ми дели комплименти или навреди? Сепак, не стануваше збор за комплименти. Младичот, некаде под 30 години, висок и крупен со перфектен италијански и добро образован. Значи, странец, но кој живее во Италија. Неговото оспорување е прецизно, ме обвинува со следново: ’Вие треба да престанете да не' нарекувате Славобугари. Ние сме Македонци и точка. Нашата култура е единствена, античка, ние не сме ниту Бугари ниту Словени’“, ја пренесува новинарот реакцијата на Нацоски.

Во натамошниот текст Ремондино признава, сепак, дека направил огромна грешка, нарекувајќи не' Славобугари и ветува дека подобро ќе ја проучи историјата.

„Решавајќи да си ја признаам грешката околу неточностите што ги имав изнесено, откривам преку Интернет дека мојот нов пријател е најголемиот македонски тенор на сите времиња. Се вика Благој Нацоски и живее и работи во Италија, каде што гради блескава кариера. Всушност, открив дека скоро ќе се скарав со идниот Павароти од Македонија. Македонија, не ’Бивша Југословенска Република Македонија’, како што сака Грција. Драг маестро Благој, држете си го цврсто петтолинието, затоа што историјата си ја пее и си ја свири секој како што сака“, пишува во својот напис италијанскиот новинар по средбата со македонскиот тенор. (Св.У.)