И публиката кршеше јајца заедно со Нехат Беќири

Во КИЦ сликарот откри нови дела од своето се' побогато творештво

Катерина Богоева


„Убавината на перформансот е да се изненадиш од другите. Мислев дека публиката нема да сака да ги крши јајцата, дека ќе се однесува како кон туѓо дело, но таа се однесуваше како кон заедничко, што впрочем и беше мојата замисла“ - рече вчера сликарот Нехат Беќири, по отворањето на својата најнова изложба во Културно-информативниот центар во Скопје, сумирајќи ги впечатоците од претходната вечер кога после него, и публиката со чекан кршеше околу 1.500 јајца, поставени на голема табла на ѕидот од една од галериите. Во перформансот учествуваа многумина, ги кршеа белите јајцата исполнети со различни бои, а на лицата им се појавуваа изрази на задоволство од заедничкото креирање на делото, но некои потези на рацете одаваа и чувство на одреден гнев. Поради големината на просторот, Беќири не ја искористи планираната количина јајца (околу 3.500, а не како што беше и најавено 4. 000), оставјќи ги нескршени за некоја друга прилика.

На отворањето очекувано, имаше многу публика. „После толку празници луѓето излегоа и се посветија на себе си, а можеби јас и имам некоја среќа што изложбите секогаш ми се посетени“, изјави сликарот кој и со оваа своја презентација на дела во различни формати (меѓу кои имаше слики и во големи димензии од 230 x 450 см), продолжи да открива се повисоки нивоа од своето творештвото, потврдувајќи дека на истото работи со голема предаденост.

Дел од публиката беше пријатно изненадена и од малите формати (55 x 55) на делата „Приказни за животот“, работени во акрилик на платно, кои наликуваат на цртежи.

„Ги имав и од порано, но сум ги поедноставил со текот на времето“, напомена авторот, потсетувајќи дека дека пред неговата позната, апстрактна фаза, до 1993 година се бавел со чита фигурација. Сега ги спои и двата периода, што според него најдобро се гледа во делото „Око“.

Годинава за Нехат Беќири барем според најавите, треба да биде една од позначајните за негова афирмација.Тој треба да изложува во Австрија, ретроспективно да се претстави во Приштина ( каде дипломирал и магистрирал на Факултетот за ликовни уметности), а дел од творештвото треба да изложи и во Сплит, Бихаќ и Бостон.

Има многу точности во освртот на Нора Халими, која во преговорот по повод изложбата во КИЦ, меѓудругото забележува: „Човековото присуство се чувствува постојано во пластичните концепти на овој уметник, и тогаш кога ликот на човекот не постои во вистинска смисла на зборот. Беќири создава свој посебен код, кој бара клуч за разложување на пораките кои ги изложува уметникот. Во остварување на играта Беќири станува уште подиректен“. А неговите сегашни игри на платното се продолжение на преходните, а времето барем засега е на негова страна.