Згасна А1 телевизија

Агенцијата за електронски комуникации донесе решение за престанок на радиофреквенцијата и на дозволата за работа на телевизијата

Љубиша Станковиќ

По повеќе од 18 години постоење, од саботата, најстарата приватна телевизија во државава престана да емитува програма. Одлуката за „гаснење“ на А1 телевизија ја донесе Агенцијата за електронски комуникации (АЕК).

„Со решение на Основниот суд Скопје 2-Скопје е отворена стечајна постапка за Трговското радиодифузно друштво ’А1 телевизија ДООЕЛ Скопје – во стечај’, со седиште на улица ’Перо Наков‘ број 60 во Скопје. Во член 62 став 1 алинеја 4 од Законот за радиодифузна дејност е утврдено дека дозволата за вршење радиодифузна дејност престанува да важи по сила на закон во случај на стечај или ликвидација“, соопшти Агенцијата за електронски комуникации.

Оттаму и појаснување дека во согласност со одредбата од Законот за електронски комуникации било утврдено дека „одобренијата за користење радиофреквенции по сила на закон престануваат да важат со престанок на важење на дозволата за вршење радиодифузна дејност“.

Имено, врз основа на наведените законски одредби, директорот на Агенцијата донел решение со кое престануваат да важат издадените над 50 одобренија за користење радиофреквенции во радиодифузната дејност.

Во соопштението се наведува дека по доставувањето на решението со кое одобренијата за користење на радиофреквенции престануваат да важат А1 телевизија го прекинува емитирањето на програмата во етер.

„Мислам дека со одлуката што ја донесе Агенцијата за електронски комуникации е погазен законот и она што навистина го очекувам е Советот за радиодифузија да поднесе пријава за директорот на АЕК“, ни изјави поранешниот претседател на Асоцијацијата на приватни електронски медиуми и некогашен директор на Канал 5 телевизија, Виктор Грозданов.

Укинувањето на А1 телевизија доаѓа само по четири дена откако судијката Наташа Савовска-Димитровска од Основниот суд Скопје2-Скопје, минатиот понеделник донесе решение со кое се наложува отворање стечајна постапка. На судското рочиште на кое беше водена вистинска војна во смисла на докажување на (не)ликвидноста на телевизијата победа однесе Управата за јавни приходи, на чија иницијатива Јавното правобранителство побара отворање стечај.

Залудни беа напорите на адвокатите на телевизијата да докажат дека долгот не е толкав како што се прикажува, но со свои финансиски параметри излезе и тогаш времениот стечаен управник Ацо Петров. Петров рече дека вкупните долгувања на А1 телевизија и на неа сродните компании е некаде околу 1,7 милијарди денари.

„Слушнав за одлуката на Агенцијата, но засега немам размислувано што ќе значи таквата одлука за моето натамошно постапување. Мислам дека некои работи ќе станат појасни веќе по празниците, односно по консултациите што ќе треба да ги имам со судот“, ни изјави стечајниот управник на А1 телевизија, Ацо Петров.

Одлуката за згаснување на најстарата приватна телевизија во Македонија предизвика вознемиреност на само во домашната јавност, туку и кај меѓународната заедница. Амбасадите на САД, на Европската унија и на уште неколку други европски земји се во постојана комуникација со своите претпоставени и многу е веројатно дека тие ќе реагираат на се' позачестените обиди за загрозување на слободата на говорот, јавија вчера неколку информативни агенции .

Одисејата на А1 телевизија започна уште кон крајот на минатиот ноември кога во нивните простории упаднаа инспектори на УЈП и на Финансиската полиција, помогнати од силни полициски сили. Оттаму беа изнесени купови документација со која требаше да се потврдат сомневањата дека сопственикот на А1 телевизија, Велија Рамковски, затајувал данок и перел пари. Всушност, вистинските проблеми за телевизијата дојдоа кога на 24 декември дојде до апсење и притворање на Рамковски и на повеќемина негови блиски роднини и соработници.