Реакции за згаснувањето на А1

Удар за македонската демократија

Груевски ја исполни заканата што ја даде на ланскиот роденден на ВМРО- ДПМНЕ, реагира опозициската СДСМ по повод конечното затворање на А1 телевизија. СДСМ го нарече тоа најтежок удар врз македонската демократија.

„Згаснувањето на телевизијата што постои 18 години претставува еден од најтешките удари за македонската демократија. Се уништи еден од симболите за независност на македонската држава, независност на медиумите, синоним за плурализмот и слободата на говор. Ова е уште една срамна одлука што ќе биде негативно забележана во македонската историја“, изјави портпаролот Емилијан Станковиќ.

Станковиќ додаде дека згаснувањето на А1 нема врска со расчистување на евентуален криминал, туку претставува гола, брутална пресметка на Груевски со критички настроените медиуми. „Ако веќе во А1 навистина има криминал, Груевски можеше да го расчистува тоа и без да ја затвори телевизијата“, рече тој.

СДСМ ја турна А1 во стечај

Со резигнација ги отфрламе обвинувањата на СДСМ, возврати ВМРО-ДПМНЕ. „Според СДСМ, во државата постојат два типа граѓани и фирми.

Едните што го почитуваат законот, ги плаќаат своите даноци и одат во стечај за долгови многу помали од 30 милиони евра, а од другата страна се партиско медиумските коалициони партнери на СДСМ, за кои законите, според СДСМ, не треба да важат“, се вели во реакцијата. „Доколку СДСМ и' го плат��ше на А1 својот долг направен за парламентарните избори во 2011 година, можеби, телевизијата немаше да оди во стечај. Дали СДСМ упатува јасна порака дека, како во минатото, така и во иднината ќе биде толерантна кон криминалот и свесното прикривање на даноците“, прашува ВМРО-ДПМНЕ.

Незаконски укината фреквенција

Начинот на кој Агенцијата за електронски комуникации (АЕК) ја укина фреквенцијата на националната телевизија А1 претставува груба повреда на Законот за радиодифузната дејност и на надлежностите на Советот за радиодифузија, реагираа вчера Здружението на новинари, Македонскиот институт за медиуми и новинарскиот синдикат.

Тие обвинија дека укинувањето на фреквенцијата е направено без одлука за одземање на дозволата на А1 од страна на Советот за радиодифузија, кое е единствено тело надлежно за спроведување на Законот за радиодифузна дејност. „Согласно со член 55 од овој Закон, одобрението за користење фреквенции АЕК го издава само врз основа на одлука за доделување дозвола за радиодифузна дејност, од што јасно произлегува дека АЕК не може своеволно да го одземе ова одобрение без акт од Советот за радиодифузија“, велат во реакцијата. Бараат Советот за радиодифузија итно да се произнесе за оваа ситуација.