Ромпуј го охрабри Иванов да го решава името

И според претседателот на ЕУ, време е да се донесе одлука за спорот

Брисел - Шефот на државата, Ѓорге Иванов, се сретна вчера во Брисел со претседателот на Европскиот совет, Херман ван Ромпуј, кој исто како и претседателот на ЕК му испорача едно главно барање - да се реши спорот околу името, и тоа што е мо��но побргу.

„ЕУ целосно стои зад определбата за евроинтеграција на земјата. Ние како Унија силно ги поддржуваме напорите што водат кон заедничко прифатливо решение за спорот околу името, што е можно побрзо. Го охрабрувам претседателот да го поттурне напред решението и верувам дека постои голема можност да се постигне тоа. Време е двете страни да донесат одлука“, изјави Ромпуј на прес-конференцијата со Иванов. За да биде поубедлив, претседателот на ЕК посочи дека приклучувањето кон ЕУ е суштинско за иднината на Македонија, оти тоа ќе помогне да се зголемат инвестициите и да се намали невработеноста, а ќе биде и столб на мултиетничкото општество што е многу битно за земјата. Овие важни цели, рече тој, одат рака под рака со реформите во земјата, па го охрабри Иванов и таму да вложи што повеќе напори, бидејќи Европската унија од нас го очекува тоа.

Претседателот Иванов овој пат не ја спомна 1995 година, но наведе дека Белгија и Македонија имаат специфичен политички модел на демократија, па посака токму во време на претседателствувањето на оваа земја Брисел да ни даде преговори за членство со ЕУ. „ Останува наша заедничка цел да работиме граѓаните на Македонија да го именуваат претседателот на ЕК како свој“, рече Иванов. Околу спорот за името Иванов соопшти дека го информирал Ромпуј за „активностите за надминување на оваа ирационална блокада“, со очекување дека оваа пречка што побрзо ќе биде оставена зад нас и оти ќе надвладее европскиот дух. На Ромпуј, со кој се сретна веднаш откако беше именуван за претседател и додека тој беше белгиски премиер, Иванов им го пренел силниот евроентузијазам на граѓаните во Македонија, секако, без да каже дека е помал од претходно.

Зборовите на Ромпуј, практично, беа рефрен на она што го порача вчера претседателот на ЕК, Жозе Мануел Баросо, кој изјави дека е време да се донесе одлука во врска со прашањето за името.„ Сега сум многу поуверен оти тоа ќе се случи, отколку што бев пред неколку години“, рече Баросо, ширејќи намерен оптимизам. (Н.Р.)