Поглед

Колапс на „Гоце Делчев“

Снежана Калабакова

Скопје деновиве е во вистински сообраќаен колапс откако по десната страна на мостот „Гоце Делчев“ се вози само по една лента. На ужасни жештини и по спарно време секое утро нервозни возачи и патници стојат во колоните од возила, кои речиси лазат по мостот, на кој Топлификација реши да менува цевки стари четири децении.

Најпрвин од претпријатието тврдеа дека работат во две смени и ветуваа дека 15 дена порано од планирано работите ќе бидат завршени. Но, само два дена потоа, се испостави дека Топлификација не добила дозвола од Градот за изведување на планираната санација. За да ги изведува градежни работи на мостот, си побарала дозвола од Општина Центар и ја добила.

Во случајов сосема е неважно дали од Топлификација знаеле или не дека за мостот е надлежен Градот, но чудно е како не го знаеле тоа од Општина Центар. Ова ги натера градските власти да ги забранат градежните активности и работите на мостот беа стопирани. Дали сега тие ќе го санкционираат неодговорното однесување на општинарите, доправа ќе се види. Во Центар требало да знаат дека мостот е во надлежност на Градот и дека тој, исто така, не смее да дава согласност за изведување какви било зафати на него без претходни консултации и согласност од Градежниот факултет и од експертите од ИЗИИС.

Хаосот што беше предизвикан од Општина Центар и од Топлификација сега секојдневно им ги кине нервите на скопјани. Дополнителен проблем во нормалното одвивање на сообраќајот сега е и целосното затворање на булеварот „Илинденска“. За да се стигне до работното место, вртењето низ централното градско подрачје е уште понервозна варијанта. Едно е јасно, и сега по којзнае кој пат се покажа дека за вакви битни прашања надлежните имаат неодговорен однос, а жртви се граѓаните.