На чекор до парламентарна криза

Неизвесно е кога и дали СДСМ ќе учествува во усвојувањето на Деловникот

Соња Крамарска


Македонија се наоѓа на чекор до парламентарна криза - неизвесно е дали СДСМ ќе учествува во усвојувањето на Деловникот. Брисел бара актот со кој се уредува работата на парламентот и правата што ги има опозицијата во тие рамки, да биде донесен со консензус. Во 2008 година, ова време, ВМРО-ДПМНЕ донесе Деловник заедно со уште 170 закони прескокнувајќи ја опозицијата, што произведе жестока опомена од амбасадорот на Брисел, Ерван Фуере. Опозицијата, пак, се жалеше дека со Деловникот донесен по мерка на владините пратеници е збришана од парламентарниот простор.

Утре во Брисел заседава Советот за стабилизација и асоцијација за Македонија, а владината машинерија во парламентот работи под полна пареа да добие пофалби од ЕУ. Вестите што пристигнаа оттаму не се поволни за власта, што доведе до растење на нервозата во парламентот, која кулминираше завчера.

Клучните играчи на ВМРО-ДПМНЕ во парламентот, Трајко Вељаноски, Силвана Бонева, Илија Димовски, буквално ги молеа пратениците на СДСМ, Нова социјалдемократска партија на Тито Петковски и Нова демократија на Имер Селмани, да дојдат во дебатната сала и заеднички да го изгласаат новиот Деловник. Но, попусто, бидејќи клупите од левата страна останаа празни.

Овој пат ВМРО-ДПМНЕ се воздржа од еднострано изгласување на Деловникот, меѓутоа молбите ги заменија со жестоки напади врз СДСМ и врз партнерите. „СДСМ не сака Европа да даде позитивен извештај за Македонија“, налутено изјави Илија Димовски. „Имајте предвид дека одговорноста за оваа состојба ни е заедничка“, и' порача на опозицијата шефот на парламентот, Вељановски.

Но, што се случува зад кулисите на парламентот кога на јавна сцена страстите се толку зовриени и што значи тоа за политичката атмосфера во земјата во пресрет на заседанието на Комитетот за стабилизација и асоцијација?

Трајко Вељаноски, очигледно, добро знаеше дека СДСМ нема да дојде на гласање на Деловникот. Неговиот напишан говор што го прочита во дебатната сала беше исполнет со апели за нивно доаѓање. Изненадување не се забележа ниту во настапите на другите пратеници од ВМРО-ДПМНЕ. Тоа, пак, може да значи само едно, а тоа е дека и покрај сознанието дека опозицијата ќе бојкотира, владиното мнозинство, сепак, ги вклучи камерите во парламентарниот дом за да го „осветлат“ отсуството на СДСМ во моментите кога Македонија ја бие битката за Европа.

Иако длабоката политичка криза во која се наоѓа Македонија се' уште не е поткрепена со официјални оцени, нејзините последици се' повеќе се видливи. Саботното фијаско на напорите на Владата да направи барем еден позитивен чекор пред состанокот на Советот за стабилизација и асоцијација, пропадна поради лошата комуникација меѓу ВМРО-ДПМНЕ и СДСМ.

Конфликтот не може да се реши ниту на лидерско ниво, бидејќи односите меѓу Груевски и Црвенковски се толку затегнати што е речиси невозможно тие двајцата да остварат ниту телефонска комуникација, а камоли да се сретнат и да се договорат.

По вестите дека СДСМ го бојкотира гласањето за Деловникот, Груевски во саботата бесно возврати: „Пратениците на СДСМ ја исполнуваат желбата на Црвенковски да и' наштети на државата“. Него��иот директор за партиски комуникации, Илија Димовски, уште при едностраната парламентарна расправа ќе им залепи етикета на пратениците од СДСМ дека заедно со грчките екстремисти ја сочинуваат групата на деструктивни елементи.

Целата владина машинерија е ставена во погон да извојува барем една битка пред утрешниот состанок во Брисел. Престрелките меѓу ВМРО-ДПМНЕ и СДСМ во петокот во парламентот го вклучија алармот во Владата. Мартин Протоѓер, генерален секретар на ВМРО-ДПМНЕ и шеф на канцеларијата на премиерот Груевски, веднаш по прекинот на седницата му се јави на Илија Димовски за да даде натамошни инструкции. Но, овој пат без резултати, бидејќи влијанието треба да се употреби кон СДСМ.

„Додека имаа сила, ја игнорираа пратеничката група на СДСМ, ни ги скратија сите парламентарни инструменти, иако е јасно дека парламентот е единственото место каде што опозицијата може да влијае врз политичките текови“, вели партиски ветеран на СДСМ. Сега, велат пратеници од СДСМ, им требаат нашите гласови за да се претстават во Брисел како конструктивна власт, иако не се тоа.

Јани Макрадули, поранешен шеф на парламентарците од СДСМ и потпретседател на парламентот, вели дека судирот настанал поради политичките игри на Владата да одбегне парламентарна контрола над буџетските средства. „Доставивме предлог за формирање независно парламентарно тело за контрола на јавните финансии“, вели тој.

Според нашите информации, во заднина на таквиот потег на опозицијата е да се пресече дотекот на буџетските средства за рекламите што ги прави Владата глорифицирајќи ги својата политика и владеењето. Владата, пак, по се' изгледа никогаш нема да може да се откаже од скапите реклами што станаа препознатлив стил в�� нејзиното практикување на власта. (С.К.)