Директорските фотелји поудобни од советничките

Здравев и Бахчовановски вршеа двојни функции речиси три години. Неофицијално, усно ги отстапиле советничките столчиња

Деспина Трајковска


Директорските фотелји, сепак, се најудобни. Тоа, најверојатно, од 1 септември ќе го докажат неколкумина функционери од ВМРО-ДПМНЕ, кои во изминатава година, а некои дури и веќе трета година едноподруго во исто време вршат неколку функции, спротивно на законот. Потклекнати пред ултиматумот од матичната партија, независно што извесен период антикорупционерите и јавноста им укажуваше на судир на интереси, Владимир Здравев, Владимир Бахчовановски и Виктор Камиловски, дури сега го „разбраа“ законот и ќе ги отстапат советничките столчиња.

Сите тројца како едни од најистурените функционери од власта, кои жарат и палат и на локално ниво, сепак, одлучија да се откажат од паралено вршење функции. Директорите, а во „слободно време“ општински советници, наводно, веќе усно ги депонирале оставките што, сепак, треба да се официјализира пред колегите во Советот. Неофицијално, одлучиле да седат само во директорските фотелји. Ниту еден од нив вчера не сакаше да потврди оти и дефинитивно ќе се исправи пред законот дури сега и тоа по партискиот налог, но и директно укажување од министерот за правда, Михајло Маневски.

Единствено Владимир Бахчовановски, директор на Јавното станбено претпријатие и координатор на советничката група на ВМРО-ДПМНЕ во Советот на Општина Центар, вчера потврди дека ќе го испочитува дадениот рок за да одбере само една фотелја. Не потврди која, но извесно директорската во ЈПССДП му е поудобна.

„Ќе го испочитувам укажувањето од партијата, а од која функција ќе се откажам, се' уште не сум размислувал. Сметам дека и на двете го давам својот максимум и придонесувам за доброто и на претпријатието и Советот, односно граѓаните, но од едната до 1 септември сигурно ќе се откажам“, накусо ни изјави Бахчовановски, без да одговори зошто требаше од матицата да му укажат оти незаконски држи двојни функции и да се откаже од едната, иако од него го бараа тоа и антикорупционерите, а го прозиваше и јавноста. „Немам коментар“, дополни Бахчовановски, кој паралелни функции тера веќе трета година. Имено, тој е член на Советот на Општина Центар веќе втор мандат, а истовремено една година е и директор во ЈПССДП откако претходно паралелно со советничкото столче година и половина ја грееше и директорската фотелја во ЈП „Македонски шуми“.

Слична е ситуацијата и со Владимир Здравев, директор на МЕПСО. Актуелен претседавач на Советот во Општина Центар е втор мандат, а трета година му тече во МЕПСО. Кога дојде на чело на Советот, освен што беше и директор во МЕПСО членуваше и во Управниот одбор на јавното аеродромско претпријатие „Македонија“, а кусо време пред тоа беше и директор на Институтот за акредитација. Поради доцнење со депонирање на оставките, неколкупати беше опоменат од антикорупционерите.

Пред две години тие дури и констатираа оти судирот на интереси го демонстрирал за време на гласањето за измена на урбанистичкиот план „Мал ринг“ не повлекувајќи се од гласањето токму за ДУП од кој наводно имал приватен интерес. Досието поради судирот на интереси повторно му се актуализираше сега иако практично трета година тој остана имун на законот. Здравев, кој важи за близок човек на врвот на ВМРО-ДПМНЕ, сега, сепак, ќе остане само со една фотелја и тоа принуден од матичната партија. Општина Центар, пак, практично ќе остане без „градоначалникот во сенка“ и диригентот во општинскиот Совет, кој има голем удел за реализација на владините проекти што мора да се филтрираат низ локалните канали.

Здравев вчера немаше време за кус коментар околу последните случувања. Недостапен за коментар остана и Виктор Камиловски, актуелен директор на Градска болница и прв човек на Советот на Општина Аеродром. Тој истовремено е и официјален лекар на Македонската фудбалска репрезентација.

Освен Камиловски, кој досега во медиумите воопшто не ги коментирал прозивките на негова сметка, Здравев и Бахчовановски неколкупати повторуваа оти сметаат дека вршејќи ги паралелните функции, не предизвикуваат судир на интереси.

Инаку, од советничките столчиња Здравев, Бахчовановски и Камиловски неофицијално добиваат меѓу 20.000 и 30.000 денари, но и други бенефиции.

Овие тројца се само дел од долгата листа функционери што незаконски вршат паралелни функции. Не само во Општина Центар и во Аеродром, двојни функции се регистрирани и кај функционери во други градови и општини. Во текот на вчерашниот ден градоначалникот на Штип, Зоран Алексов, упати апел до функционерите и советниците во Советот на Општината да се откажат од една од функциите што ја извршуваат. Се чини дека неговиот пример, по урнекот на матичната ВМРО-ДПМНЕ, ќе го следат и останатите негови колеги.