Насловна

Си велам

Груевски и Ахмети не брзаат за ЕУ

Ерол Ризаов

Само без европеизација може да се има апсолутна власт

На Никола Груевски и на Али Ахмети не им се брза со евроатлантските интеграции колку и да тврдат дека тоа е најголем приоритет и врвен стратегиски интерес на Македонија и на нејзините граѓани. Ако внимателно се анализираат сите потези во последните пет години откако Груевски стана премиер, се доаѓа до трагичен заклучок дека, всушност, стратегијата за членство во ЕУ и во НАТО е да не се дозволи Македонија да се европеизира или да прифати високи западноевропски стандарди на демократија, европски правила на работа, на правна држава, висок с��епен на толерантност, компромис, одговорност за управувањето со државата дома и нула проблеми во односите со соседите.

Политичките и економските реформи по бриселски терк во Македонија се во сериозен застој. Во такви услови Груевски и Ахмети ја поделија власта како воен плен. Министерствата и функциите беа поважни од заедничката програма на Владата за евроатлантски интеграции. Притоа, Груевски и Ахмети сосема заборавија дека партиите што не влегоа во Владата имаа повеќе гласови на изборите. ДУИ повторно разочара со определбата да управува со министерствата и со фондовите кои располагаат со повеќе пари отколку да влијае пресудно за поголема демократизација и европеизација на Македонија. ДУИ испушти историска шанса на чело на парламентот да ја постави Теута Арифи, која ќе покажеше што значи парламентарна демократија, вака уште четири години ќе гледаме арогантна партиска гласачка машина.

Проблемот со името е извонредно добар параван за затскривање на доктрината да се одложуваат европските стандарди на владеење и на живеење.

Само без европските норми може да се има апсолутна власт добиена по демократски пат како неприкосновена волја на народот. Тоа е можно со мирни избори на уплашен народ и со озаконета политичка корупција со кредит од ММФ во износ од 220 милион евра. Владата уште не кажува колку и за што се потрошени тие пари дадени за сосема друга намена, а не за предизборен комодитет. Се споменува неофицијално бројката од 150 милиони евра исплатени пари повеќе во месецот на предизборната кампања отколку што е вообичаено во тоа време кога нема избори. Сега ќе ги враќаме парите предвреме на врат на нос, што мислите кој ќе го плати цехот. Само така може да се владее без никаква контрола и одговорност. Во таква држава може да прави судски записник дактилографка без да бидат сослушани обвинетите и сведоците. За тоа претседателот на судот на чувствува одговорност. Во таква држава специјалната полиција може да убие невино момче на 100 метри од премиерот, а потоа граѓаните да се лажат јавно два дена дека тоа не се случило. И за тоа никој не е одговорен освен полицаецот од обезбедувањето на премиерот. Соучесниците што знаеле за убиството, а молчеле, наместо на суд, одат на конференција за печат да кажат дека не чувствуваат одговорност, ни кривична ни морална. Во таква држава лесно може да се скрши „кичмата“ на младешкиот бунт и порив за правда и слобода. Во таква држава се задушува синдикалното движење, социјалните и студентските протести со познатиот ракопис на ВМРО-ДПМНЕ: контрапротести пред опозицијата.

Во меѓувреме, ќе си проаѓаат крај нас возовите за Брисел. Не' шишнаа Бугарија и Романија како јапонските шинкансен возови, иако поодамна пред нив бевме на перонот. Реагиравме како балкански геџо: нека оди возот, важно билетот е кај нас. Помина и Хрватска, крај нас онака полека како патнички, дански кралевски, со германска влеча и со големо задоцнување. Ама помина и замина. На 1 јули 2013 ќе стаса во Брисел. На товарните возови веќе се качуваат Србите, Црногорците, Албанците и Бошњаците и каде и да е, за некоја година ќе стигнат и тие во Европа, онака пренатоварени како последниот воз од Катанга. Македонија останува на слеп колосек, чека воз без возен ред. Го чека, галиба, „Ориент експрес“ од Истанбул за Париз. Несреќата е во тоа што никој не ни кажува дека тој воз со децении веќе не сообраќа. Уште татни со парна локомотива само во романите на Агата Кристи и на фотографиите во турскиот музеј на возови.

Да му е..м мајката на турскиот султан што не' остави сираци на Балканите. Останавме осамени на Балканот оти сите ни завидуваат. Не не' сакаат оти сме многу умни, чокак’ллии, културни, образовани, толерантни, богати, недостижни во секој поглед. Не' мразат оти имаме богата и славна историја од македонскиот неолит и она свирче од пред 30.000 години што уште свири, па преку старите антички цивилизации се' е наше. Старите кралеви и цареви од пред Филип Втори уште од Кеопс и Тутанкамон до Александар Македонски, се' е македонско. Наши се Дедал и Икар, Јустинијан, Костантин Велики, династијата на Птоломеите, Цезар, Октавијан и Клеопатра, Дикоклецијан, Господ Исус Христос и природно мајка му св. Дева Марија. Сите се наши. Еве, прашајте ги Паско Кузман и Вангел Божиновски, ќе видите дека е така. Од нас повеќе бараат само Грците. Тие го сакаат сето ова што е наше и плус го бараат целиот космос. Тоа е логично оти зборот космос е старогрчки и природно и' припаѓа на Грција.

И цела Европа и' припаѓа на Грција. Европа зазема високо место во старогрчката митологија. Европа е феникиска принцеза девица што ја киднапирал грчкиот врховен бог Зевс, ја однел на Крит и ја силувал секој ден повеќе пати преправен во бел бик. Потоа Европа откако малку навикнала на силување и почнало тоа да и' се допаѓа, станала прва кралица на Крит. А двата континента, Азија и денешна Европа, се карале кој да го земе нејзиното име. Затоа Грција може неказнето да ја силува Европа секој ден колку сака и кога сака. Или преправена во банкрот или во бел слон сеедно, на Европа уште и' е убаво. Грција, како и на Македонија, може да и' забрани на Европа така да се вика бидејќи тоа е нејзино име што задира во грчкото достоинство и гордост, а поттикнува и на иредентизам. Не можат европските варвари да ја европеизираат аристократска Елада, како што овие вулгарос славомакедонико можат да ја варваризираат денешна Грција.

Па, ако вселената е нивна. Ако Европа и целиот свет се нивни. Ако е нивна целата античка историја и култура како тогаш да влеземе во Европа. Јас имам за тоа безболно решение. Како што Вардар се спои со ФК „Миравци“ и повторно остана во Првата лига, така треба да се фузионираме со некој што е во првата лига во Европа. На пример, со Бугарија, Грција.... за НАТО може и со Албанија или со Турција. Може и да се поделиме, па кој сака со Словенија, со Хрватска, со Бугарија, со Грција, со Албанија, со Турција. Тие што ќе почекаат малку, можат да одбираат и со Србија, со Црна Гора или со Косово. Си велам дека најдобро е преку Паљурци да се споиме со Ватикан. Така најбргу ќе стасаме во Европа.

Има само еден мал проблем. Миравци не сака да се фузионира со Вардар.

Сака не сака, ќе мора. Во Македонија може и да испаднете и да влезете во прва лига со препорака на власта. За спојување со Ватикан, треба ли нешто да менуваме. Ништо. Само верата.