Лозарите во паника, паѓа цената на „кратошија“

„Агротиквешија“ препозна политика во откупот на грозјето

Ангел Данов

КАВАДАРЦИ - Паника, револт и неизвесност. Вакво беше вчера расположението кај тиквешките лозари, откако како молња се прошири веста дека откупувачите и преработувачите ја спуштија цената за килограм „вранец-кратошија“, една од најмасовно застапените вински сорти во Тиквешко.

Лозарите велат дека сега килограм грозје од оваа сорта се откупува само за девет денари за килограм за шеќерност од 20 проценти. До вчера се плаќале и 12 денари за иста шеќерност. Производителите на грозје крајно револтирано изјавуваат дека со ова се погребува лозарството во Македонија, а полека, но сигурно, се уништува и егзистенцијата на илјадници фамилии.

Од регионалниот сојуз „Агротиквешија“ немо ја следат ситуацијата и коментираат дека е извршен невиден атак врз откупната цена, алудирајќи на големите винарски визби, кои и годинава биле кумови на цените. Од ова здружение препознаваат и политика во откупот и во цените. Се сомневаат дека во новонастанатата ситуација прсти има вмешано политиката. Извори од „Агротиквешија“ тврдат дека опозицијата им диктирала на винарските визби да ги намалуваат цените за да има незадоволство кај народот!

„Визбите сакаат да ја намалат цената и за грозјето што се извезува. Странските купувачи плаќаа во готово по 12 денари за килограм. Имаше одличен извоз. Со оваа цена се' се запира“, велат од „Агротиквешија“ од каде што до пред извесно време најавуваа и штрајкови доколку нема повисока цена за 30 отсто.

Нашите информации говорат дека винарската визба „Тиквеш“ откупува грозје од своите долгогодишни кооперанти во согласност со планот и програмата што ги има визбата. Од оваа винарска визба велат дека нема вистина во гласините дека цената за кратошијата е намалена.

„Годинава, за разлика од претходните години, ‘Тиквеш‘ се воздржа од истрчување со цените. Се чекаше прво друг да објави, за да не не' обвинуваат дека ние ги диктираме цените“, велат нашите извори од „Тиквеш“.

Вчера и помалите откупни пунктови имаа застој во откупот. Познавачите тврдат дека целата состојба е резултат на големите резерви вино во винарските визби особено од „кратошија-вранец“. Оваа сорта се' уште не се откупува во винарската визба „Повардарие“ во Неготино. Единствено овде е почнат откупот на висококвалитетни вински сорти, а извршена е и смена на менаџерот во „Повардарие“.

Гроздоберските празнувања завршија, но во Тиквешко бербата е завршена само 20 проценти. Лозарите во надеж дека мн��гу брзо работите ќе се сменат на подобро и оти власта ќе ја согледа реалната состојба во Тиквешко. И додека симнатите цени го нарушија мирот на лозарите, родот пропаѓа на нивите.

Производителите на грозје забележуваат дека значително е намалувањето и на цената за висококвалитетните сорти. Пред три дена заменик- министерот за земјоделство, Перица Иваноски, при посетата на Кавадарци за време на гроздоберските празнувања во изјавата за медиумите ги убедуваше лозарите дека цените биле исти како ланските и немало никаков проблем со откупот.

Големи се уценувањата за тоа дали купеното грозје да се плати во готово или на почек. Така, на пример, на некои пунктови се плаќале девет денари за килограм кратошија ако се бара исплата веднаш и десет денари ако лозарите се стрпат до март наредната година. За разлика од лани многу помалку се плаќа во готово по самото предавање.

Лозарите стравуваат дека цената ќе се намали и за најмасовно застапената винска сорта грозје, смедеревка. Гневни се на сето ова што им се случува и настапуваат самокритично, дека поради неорганизираност ќе ја изгубат егзистенцијата. Голем дел од лозарите со кои разговаравме се' уште чекаат да биде организиран штрајк од „Агротиквешија“.

Коментарите одат и дотаму дека не било в ред за организирање штрајк прво да се согледува која гарнитура е на власт и од која власт затоа што поединци што се претставуваат за претставници на лозарите ќе имаат корист. „Ниту пет денари да дава државата за субвенции по килограм грозје нема да се покрие понижувањето што го прават визбите“, ова е ставот на лозарите.