Насловна

Згаснаа весниците „Време“, „Шпиц“ и „Коха е ре“

Денешните изданија на овие три весници се последни, а стотина новинари заминуваат на принуден одмор

Љубиша Станковиќ


Весниците „Време“, „Шпиц“ и „Коха е ре“, кои ги издава компанијата „Плус продукција“, од денеска нема да се печатат, а стотина новинари од сите три редакции заминуваат на принуден одмор.

На ваков чекор се одлучиле трите редакции по состанок што го одржале со менаџментот на компанијата. По сугестија на луѓето што ги водат весниците, била донесена одлука со која излегувањето на сите три дневни весници се стопира, а новинарите ќе заминат на едномесечен принуден одмор. Како што неофицијално се дознава, уредништвата на вес��иците од менаџментот побарале едно долгорочно решение со кое „Време“, „Шпиц“ и „Коха е ре“ би можело да излегуваат непречено, а колку-толку би се норамализирала и исплатата на платите на вработените. На ваквите барања било одговорено дека е невозможно да се реагира во краток рок и дека фирмата не може повеќе да го сервисира натамошното излегување на весниците.

„Денеска на продажните места ќе излезат последните броеви на ’Време’, ’Шпиц’ и ’Коха е ре’. Повеќе не сме во можност да ги издаваме весниците бидејќи немаме ниту хартија ниту бои, а познато е и тоа дека ни беа одземани и возилата со кои ги дистрибуиравме весниците“, вели Коле Чашуле, главен и одговорен уредник на весникот „Време“.

Иако во јавноста беа пласирани одредени шпекулации што упатуваа на тоа дека состојбите ќе се санираат за еден месец, неизвесно е дали ќе се случи тоа и дали ќе бидат обезбедени милион евра колку што побарува Управата за јавни приходи од „Плус продукција“.

Компанијата што стои зад трите весници не знае колку точно треба да и' плати на УЈП на име неплатени даноци за изминатите шест години. Всушност, се' започна со побарување што беше двојно помало од она што сега го испорача УЈП, но кога беше доставено даночното решение, тоа гласеше на милион евра.

Дали овие три весници ќе згаснат засекогаш или за нив ќе се најде купувач, ќе покаже времето. Продажбата на весниците не ја исклучи и главниот уредник на „Шпиц“, Бранко Героски, но тој е на мислење дека и доколку се најде купувач, не треба да се исклучи можноста долгот повторно да биде зголемен. Токму поради долгот што го има „Плус продукција“ кон УЈП, трите весници од „Перо Наков“ во изминативе неколку месеци наидуваа на големи пречки. Печатницата „Мисирков“, каде што се печатеа трите весници, со тешки маки набавуваше хартија и материјали за печатење, а даночниците запленија и десетина комби-возила со кои се дистрибуираа весниците, а од средината на минатата недела „Време“, „Шпиц“ и „Коха е ре“ го намалија и бројот на страници и се печатеа во црно-бела техника. На десетиците новинари од трите дневни весници вчера поддршка им даде Синдикатот на новинарите.