Нема ни хигиена ни пари од Законот за јавна чистота

Никој не кажува ни колку средства се собрани ни каде отидоа парите од казните

Снежана Калабакова

Помина речиси една година откако е донесен Законот за јавна чистота, а сликата со хигиената по автобуските постојки, на тротоарите, улиците и парковите и тоа во централното градско подрачје остана непроменета. И натаму нема нови кошници за смет, тротоарите се послани со догорчиња од цигари, а тревниците со разни отпадоци. А, Законот беше мошне ригорозен, за фрлено догорчено казната изнесуваше 50 евра.

Се чини никој веќе не казнува на автобуските постојки за фрлено ѓубре, ниту на улиците за паркирање до контејнер или во тревната површина. А веднаш по донесувањето на Законот, јавноста беше буквално бомбардирана со информации колку казни биле изречени, колкумина платиле во готово, а колкумина ја одработиле казната. Од собраните средства освен нови кошници за отпадоци во Градскиот парк и контејнерите што ги обезбеди Владата, не видовме ништо друго. Јавноста не дозна ниту колку средства се собрани од казнетите граѓани ниту, пак, каде отидоа тие пари.

Од градската Канцеларија за информирање велат дека буџетот на Скопје не предвидува средства за поставување кошници за отпадоци, освен оние што ги постави во Градскиот парк и средствата што ги обезбеди за набавка на новите контејнери. Толкав е, велат, наследениот буџет.

Одговор на прашањето не добивме ниту во Министерството за транспорт и врски. Оттаму велат дека средствата кои по основа на санкционирање согласно со Законот за јавна чистота се прибираат од страна на комуналните редари, се распоредуваат во буџетот на Општината во која е направен прекршокот, додека средствата кои по овој основа ги прибираат полициски службеници, односно МВР се распоредуваат во буџетот на државата. За добивање точни бројки, не' упатија до Министерството за финансии, односно до единиците на локалната самоуправа.

Во скопските општини Гази Баба и Бутел велат дека многу малку пари биле собрани од казните што биле изречени на самото место. Со оглед на стандардот на граѓаните, најголем дел од казнуваните избирале да одработат општествено корисна работа.

„Од јануари до август Секторот за внатрешни работи на Скопје има утврдено 6.769 прекршоци од Законот за јавна чистота. Од нив 452 граѓани платиле глоба, а 1.069 добиле налози за да ја одработат казната. Против 5.309 граѓани кои ниту платиле глоба ниту, пак, во полициските станици донеле потврда за извршена општествено корисна работа, биле поднесени прекршочни пријави“, вели Лиза Бендевска, портпарол во СВР-Скопје.

Од Транспорт и врски информираат дека во периодот од 22 септември лани до 15 годинава, Државниот комунален инспекторат има извршено вкупно 214 контроли на општините во Република Македонија за надзор на спроведувањето на Законот за јавна чистота. Во овој период била извршена контрола и на вкупно 79 јавни претпријатија, каде што било укажано на спроведувањето на одредбите од Законот за комунални дејности и другите закони од областа на комуналните дејности.