Бошкоски најави жешка есен

РОСОМАН - Писмена гаранција на производителите на праски и на грозје од Росоман дека ќе водат грижа за откуп и ќе се вреднува секој плод од македонските ниви, им подели лидерот на Обединети за Македонија, Љубе Бошкоски.

На пазарчето што се наоѓа на регионалниот пат Градско - Прилеп, тој вчера се сретна со производителите на праски. Тие му се пожалија за штетите на земјоделските производи што ги претрпеа неодамна од големото невреме, но и на игнорантскиот однос од власта и ресорниот министерт.

Бошкоски рече дека со листот хартија на земјоделците им гарантира дека се' што ветува и ќе го исполни кога неговата партија ќе дошла на власт. За поголема заштита на правата на земјоделците најави и жешка земјоделска есен која што ќе била исполнета со масовни протести на сите земјоделски производители од целата држава.

„Цврсто ќе застанеме зад македонските земјоделци, зад нивните протести. Ова есен ние ќе застанеме на чело за да покажеме со аргументи дека оваа Влада мора да ги реши нивните проблеми, тоа што е без капацитет, тоа е друг проблем и затоа мора да си замине од политичката сцена“, рече Бошкоски. (А.Д.)