Претходен број

Лифтот на Милениумски крст пуштен во погон

Груевски беше меѓу првите што го сефтоса лифтот и панорамски го гледаше Скопје

Со благослов од архиепископот г.г. Стефан, вчера беше пуштен во употреба лифтот на Милениумскиот крст. Сефте панорамско разгледување на Скопје направи премиерот Никола Груевски, кој беше дел од првата тура од осум лица што се качи во лифтот. Возењето во него трае речиси три минути, при што тој минува низ средината на крстот, искачувајќи висина од 45 метри. Од фондацијата „Милениумски крст“ најавија дека денеска ќе ја утврдат цената на билетот за користење на лифтот, но, најверојатно, нема да изнесува повеќе од 50 денари. Парите од картите ќе се користат за одржување на објектот.

Благоја Дојчиновски, претседател на „Милениумски крст“, вчера најави дека Фондацијата интензивно работи на реализација на најголемата планирана инвестиција на комплексот, односно жичницата. Проценето е дека таа ќе биде готова во почетокот од идната година. Периодов во комплексот се работи на поплочување на платформите и на изградбата на 11-те дуќани во кои ќе се продаваат сувенири, свеќи, икони. Во задниот дел, пак, на комплексот се градат четири јавни тоалети.

Инаку, дали поради последните случувања со Владата или, пак, затоа што се' уште е на службено патување во странство, вчера на Водно не беше присутен градоначалникот Трифун Костовски. (Дс.Т.)