Поглед
Искубано јато за НАТО
 Димитар Чулев
Проширувањето на НАТО со три нови членки од таканаречената Јадранска група изгледа дефинитивно пропаѓа и, како што стојат сега работите, наместо „тројка“, Алијансата ќе добие „единица“. Новата членка Албанија.
По минатогодишното грчко вето на влезот на Македонија, Јадранската тројка е на патот да падне за два члена. Речиси неверојатно изгледа, но Хрватска од завчера, исто така, се наоѓа пред сериозна опасност да добие „двојка“ за прием поради словенечкото спротивставување.
Како веќе рамноправен член на Алијансата, Словенија активно ја користи политиката што тоа и' го овозможува и аспирациите на Хрватска се обидува да ги искористи за крупно пазарење за да ги реши сите отворени прашања со соседот на начин, кој ќе биде максимално во корист на Љубљана.
Доколку се распише референдум во Словенија за членството на Хрватска во НАТО, тоа посредно ќе значи дека Хрватска ќе го пропушти април и Самитот на НАТО каде што требаше да се официјализира членството.
Македонија, која беше иницијатор на регионалниот приод што требаше да ги подготви земјите за заеднички влез во НАТО, уште лани извиси. За личен неуспех сегашното извисување ќе го смета и хрватскиот претседател Стипе Месиќ, кој велеше дека „не во јато, туку како фрегата кон НАТО“, мислејќи притоа дека напредокот на секоја земја треб�� поединечно да се оценува.
Значи, само Албанија, која во 1997 внатрешно имплодираше во бунт во кој беа ограбени касарните и која се' уште лежи (и одвреме-навреме се тресе од експлозии) на неоткриени бункери од времето на Енвер Хоџа ги исполни критериумите на НАТО. |
