Кружен тек кај „Г. Димитров“

Летово ќе биде изграден првиот кружен тек на подрачјето на општината Карпош и тоа на раскрсницата кај средното училиште „Георги Димитров“, најави градоначалникот Стевчо Јакимовски. Новото сообраќајно решение ќе го опфати делот каде што се сечат улиците „Париска“ и „Варшавска“, непосредно до влезот на гимназијата.

Јакимовски смета дека со изградбата на кружниот тек во голема мера ќе се зголеми безбедноста во тој дел каде што сообраќајот е особено фреквентен поради близината на училиштето.

„Се одлучивме за оваа ротонда поради честите сообраќајни незгоди и метеж во близина на училиштето. Функционалноста на ваков тип решенија е докажана во речиси сите европски земји, што значи не измислуваме ништо ново, туку преземаме конкретни испробани чекори. Ова е проект на Општината, кој ќе се финансира со општински пари. Изработката на сообраќајното решение, односно проектот е во тек и очекувам работите на терен да завршат најдоцна до почетокот на учебната година“, најави Јакимовски, кој претходно планира да се изврши реконструкција на улицата „Париска“. (Дс.Т.)