Прилепскиот театар се реновира

Старата руинирана зграда на прилепскиот Народен театар „Војдан Чернодрински“, која со децении беше оставена на забот на времето, ќе се реконструира. Министерството за култура одвои 1.114.000 денари, кои ќе бидат наменети за реновирање на ентериерот на објектот.

„Овие средства не се доволни за комплетно реновирање на објектот, но затоа ние одвоивме дел од средствата од сопствениот буџет со што ќе ја заокружиме оваа инвестиција која ќе се реализира до крајот на јуни“ - истакнува Тони Чатлески, директорот на прилепскиот Центар за култура. Тој додава дека Министерството за култура има слух за нивните проблеми и барања, и според тоа, објектот кој што е всушност првото македонско кино, не само што нема да пропадне туку ќе го видиме во ново руво.

„Се закануваше целосно распаѓање на објектот зашто со децении не е реализирана никаква инвестиција. Лани успеавме да го санираме покривот, но тоа беше се'. Ентериерот на театарската куќа, гримиорните, сцената, едноставно целиот објект е во крајно лоша состојба. Најдоцна за еден месец ќе бидат завршени сите градежни работи во објектот“ - вели Чатлески.

Реконструкцијата на старата театарска куќа, според Чатлески, е императив за Центарот, зашто има огромна историска важност за градот и никако не значи напуштање на идејата за изградба на нова театарска зграда.

„ Во оваа зграда во 1917 година, ентузијастот Пане Напе за прв пат во Македонија го проектирал филмот „Дамата со камелии“, значи оваа зграда е првото македонско кино и ние никако не смееме да дозволиме објектот да биде оставен на забот на времето“, потенцира Чатлески.

Прилепскиот театар според најавите со ребалансот на буџетот преку Министерството за култура, ќе вработи 5 мина млади актери кои имаат значаен придонес во развојот на Прилепскиот театар последниве две-три години. Со овие и 11-мина вработени актери, прилепскиот ансамбл ќе биде кадровски екипиран да одговори на сите предизвици на оваа уметност. (М.Т.)