Апелација пак го одложи судењето на возачот на Тоше

Судењето на Ѓорги Ѓорѓиевски, кое по жалба треба да се одржи во Апелациониот суд во Скопје, доживеа уште едно одложување. Во овој судски предмет требаше да постапува судијата Исмаил Лимани, но поради неговото суспендирање и на уште четворица негови колеги, случајот му беше одземен и привремено му беше предаден на друг Судски совет. Сега, кога судијата Лимани е вратен на своето работно место, предметот повторно е во неговите раце и Јавна седница ќе се одржи во почетокот на јули.

Судски кривичен совет на Основниот суд Скопје 1 го осуди Ѓорги Ѓоргиевски на две години затвор за сообраќајната несреќа, која се случи на 16 октомври 2007 година, во близина на Нова Градишка, во која загина пејачот Тоше Проески. Критичниот ден Ѓоргиевски го управувал џипот „туарег“ што удрил во приколка на камион што го управувал српскиот држ��вјанин Славиша Кузмановиќ. На судењето во скопскиот Кривичен суд целиот тек на постапката, Ѓоргиевски негираше дека заспал зад воланот. Изразувајќи жал и каење за трагичниот настап, тој рече дека со заминувањето на Тоше Проески изгубил брат и пријател и со тоа веќе е казнет.

Пресудата за овој трагичен настан дојде по точно две години од настанот што се случи кај Нова Градишка. По само неколку месеци од објавувањето на првостепената пресуда, Ѓоргиевски, преку својот бранител, адвокатката Силвија Џилвиџиева поднесе жалба до повисокиот суд. Во жалбата, адвокатката останува на тврдењето дека одлуката на Кривичниот суд била донесена исклучиво врз основа на погрешна и нецелосна утврдена фактичка состојба, односно само врз база на сообраќајно-техничко вештачење. Со жалбата е оспорен и тахографот на камионот што го управувал сведокот Славиша Кузмановиќ, бидејќи не е во оригинал, туку во фотокопија. Адвокатката го потсетува повисокиот суд дека првостепениот суд најнапред го прифатил предлогот за непосреден распит на возачот на камионот, а потоа беше одбиен овој предлог.