Домашните телевизии и Бум ТВ ја расипаа калимерата

Канал 5, Телма, Сител и Алсат-М донесоа одлука за исклучување на своите програми од платформата на Бум ТВ

Миркица Поповиќ

Четири национални телевизии не сакаат веќе да се дружат со Бум ТВ. Канал 5, Телма, Сител и Алсат-М донесоа одлука за исклучување на своите програми од платформата на Бум ТВ. Директорите на овие телевизии вчера испратија писмо до „Oне“ и „Диги плус мултимедија“, кои се одговорни за Бум ТВ, во кои ги предупредуваат дека доколку продолжат со нерегуларно преземање на нивните телевизиски сигнали без одобрение, тоа ќе се смета за акт на пиратерија со легални последици според македонското законодавство.

Телевизиите преку објавувања на своите интернет-страници го осудија однесувањето на Бум ТВ, и покрај нивната забрана. „Иако Бум ТВ нема потпишан договор за реемитување на програмските сервиси на највлијателните телевизии, ниту има техничка можност за емитување на дигиталниот сигнал, словенечката компанија спротивно на легислативата за авторски права го пресретнува аналогниот сигнал на Канал 5 и се' уште бесправно го емитува и го продава како дел од своите пакети“, беше истакнато вчера на веб-страницата на Канал 5, кои се оградија од одговорност за информациите, според кои, корисниците на Бум ТВ ќе можат да ја следат програмата на националните телевизии. „Ги информираме сегашните и идните претплатници на овој сервис дека нема да бидат во можност да ги следат Лигата на шампиони на УЕФА, англиската Премиер лига, италјанската Калчо лига и другите програми на Канал 5, Сител, Алсат-М и Телма“, се наведува во објавата.

Според заедничкото соопштение на телевизиите, тие се одлучиле на овој чекор поради нерасчистени деловно-технички односи со Бум ТВ. Како што наведуваат, повеќе месеци се обидувале да ги усогласат условите и начинот под кои ќе се емитуваат на Бум ТВ. Сепак, во писмото испратено вчера до операторот, директорит�� на телевизиите истакнуваат дека се подготвени да ги продолжат разговорите за продолжување на соработката и усогласување на условите за реемитување на нивните програми преку платформата на Бум ТВ.

Од „Диги плус мултимедија“ преку соопштение информираа дека се изненадени од изјавите на овие четири национални телевизии. „Сакаме јасно да потенцираме дека „Диги плус мултимедија“ како правен субјект во чија сопственост е Бум ТВ, има согласност од сите национални телевизии и има потпишано договор со ТВ Телма за реемитување на нивните програми“, се вели во соопштението. Од „Диги плус“ велат дека комплетната документација за ова е прописно регистрирана и доставена до Советот за радиодифузија, каде што може да се провери дека програмите на македонските национални телевизии се емитуваат на Бум ТВ според пропишаната законска регулатива. „Диги плус мултимедија ќе биде активна во решавањето на ова недоразбирање, кое, се надеваме, ќе заврши за задоволство на сите страни“, стои во соопштението.

Несогласувањата меѓу овие четири телевизии и Бум ТВ се појавија откако А1 телевизија влезе во платформата на Бум ТВ и склучи договор за дистрибуирање на овој пакет, иако претходно овие две страни беа речиси завојувани. Канал 5, Телма, Сител и Алсат-М и пред извесно време реагираа и предупредија дека ќе истапат од Бум ТВ поради нарушена конкуренција на пазарот и доминантна застапеност на А1 телевизија во пакетот на Бум ТВ.