СОС-селото го одби часовникот на Тодоровски

Понудата на директорот на УБК оценета за непристојна

Даниела Трпчевска


Часовникот „ибло“ на директорот на Бирото за јавна безбедност Љупчо Тодоровски, место во СОС-детско село, ќе заврши во рацете на експертите за индустриска сопственост, што ќе утврдуваат дали е оригинал или фалсификат. Доколку се потврди дека е реплика на познатата швајцарска марка „ибло“ на фамозниот часовник му се заканува уништување. Ваквиот расплет на работите доаѓа по завчерашниот разговор што првиот човек за јавна безбедност го имал со надлежните во СОС-детско село. Откако ги информирал за своите намери да го донира часовникот, за кој се крена голема врева во јавноста, добил одговор дека ним повеќе им се потребни пари отколку часовник.

„При завчерашниот разговор директорот бил информиран од надлежните во СОС- детско село дека е посоодветно да им даде парична донација отколку часовник. За тоа колкава ќе биде донацијата и дали ќе стане збор за пари или за друга помош, дополнително ќе се договара, со цел да им се помогне на децата згрижени во селото“, вели Иво Котевски, помошник-министер за информирање во МВР.

Дека им била понудена донација од страна на првиот човек за јавна безбедност потврдуваат и од СОС-детско село. „Ние разговаравме за таа тема и околу можноста за реализација на донацијата. Притоа се договоривме СОС-детско село да добие средства или друг вид донација во вредност на часовникот“, вели Јулијана Гапо, национален директор на организацијата СОС-детско село -Македонија. Таа додава дека во разговорот не е прецизирано колку ќе изнесува донацијата.

Во СОС-детско село во моментов се згрижени 84 деца на возраст од четиригодишна до 18-годишна возраст. „Функционирањето на селото се обезбедува преку интернационални спонзорства и домашни донации, што ги има во мал процент, така што секоја помош е добредојдена“, објаснува Гапо.

Откако Тодоровски не успеа да го подари својот часовник „ибло“, како што дознаваме, тој вчера го спакувал во плик и заедно со придружно писмо го испратил до владиното Координативно тело за заштита на интелектуалната сопственост.

„Експертите ќе треба да утврдат дали часовникот е оригинал или фалсификат и да одлучат што ќе прават со него. Нивна е одлуката дали ќе биде уништен, доколку станува збор за фалсификат“, велат во МВР.

Експертите за индустриска сопственост сметаат дека по редот на нештата, доколку станува збор за реплика купена во кинеска продавница, таа треба да се уништи, а не да се продава или да се подарува.

„Прво треба да се утврди дали часовникот е оригинал или фалсификат. Доколку е фалсификат треба да се заплени, а не да се подарува. Но, тука и е моментот дека нема прекршок доколку некој одлучи да го подари часовникот, оти тој не го продава и не заработува, туку е негова лична сопственост и може да прави што сака со него“, објаснуваат експертите по индустриска сопственост.

Часовникот што директорот за јавна безбедност Љупчо Тодоровски го носеше на левата рака се забележа на фотографија во последниот број на неделникот „Глобус“, што го поистоветува со познатата швајцарска марка часовници „ибло“. Според неделникот, оваа варијанта на спортско елегантен часовник за сите прилики чини околу 25 илјади долари, а најевтината варијанта со попусти може да се добие за околу 19 илјади долари.

Прашањето како државен службеник во МВР може да си дозволи вака скапоцен часовник, дали го пријавил во својот имотен лист и многу други дилеми предизвикаа голем интерес во јавноста.

Тодоровски со соопштение објасни дека станува збор за подарок од семеен пријател, кој за него има поголема емотивна отколку материјална вредност. Дали најкоментираниот и најпосакуваниот часовник во македонската јавност ќе заврши како експонат или ќе биде уништен како фалсификат деновиве ќе одлучат експертите за интелектуална сопственост. (Д.Т.)