Насловна

Состојбата во мaкедонските медиуми забрзано се влошува

Во Македонија е неподносливо да се работи како новинар, оценуваат меѓународните федерации на новинари

И Меѓународната и Европската федерација на новинари вчера се огласија за лошата состојба со медиумите во Македонија. Остри критики дојдоа од претседателот на Меѓународната федерација на новинари, Џим Боумела. 

„Македонските новинари се под огромен притисок од политичарите и од сопствениците на медиумите и неодамнешните настани покажуваат дека државата ја достигнала точката на која едноставно станува неподносливо да се работи слободно во новинарството“, вели претседателот на Меѓународната федерација на новинари, Џим Боумела.

Со реакција излезе и Европската федерација на новинари, која пред еден месец на годишното собрание усвои изјава против нефер работните договори во македонските медиуми.

„Во последните години Македонија покажува лоши резултати во однос на  слободата на новинарството и ние сме загрижени што држава-кандидат за членство во ЕУ не работи сериозно на основните права, како што е слободата  на печатот“, нагласува претседателот на Европската федерација на новинари, Арне Кониг. Bildunterschrift:

„Се надеваме дека Европската комисија ќе ја земе предвид нашата загриженост при процената на напредокот на земјата кон ЕУ и ги повикуваме македонските власти да ги почитуваат стандардите за слободата на печатот и новинарските права“, додава Кониг.

Меѓународната и Европската федерација на новинари бараат од властите во Македонија да преземат итни мерки за подобрување на законодавството и примена на законите на неселективен начин за да се спречи новинарите да бидат отпуштани од сопствениците на медиумите со заобиколување на стандардните процедури.

Вкупно над 200 новинари и медиумски професионалци можат да ги загубат своите работни места во наредните месеци. Голем број новинари се под постојан притисок да работат за политички или бизнис-интереси, стои во дописот од двете организации. (Дојче веле)