ССМ бара од власта мерки за заштита на стандардот
ССМ очекува приватниот сектор да ги искористи средствата што ќе ги добие од намалениот персонален данок
Сојузот на синдикатите на Македонија вчера побара од Владата да преземе итни и ефикасни мерки за запирање на трендот на зголемување на цените и заштитата на стандардот на граѓаните, од кои, како што истакнуваат, дури една третина од населението живее на работ на сиромаштија.
„Бараме враќање на цената на некои прехранбени производи, интервенции од стоковните резерви, интервентен увоз, даночни и царински олеснувања, како и зголемување на паричните износи за социјално загрозените семејства. Бараме и преиначување на одлуката на Владата за зголемување на платите во јавниот сектор, односно планираната корекција од 24 отсто за наредните две години да го добијат само вработените кои имаат плата под државниот просек“, истакна на вчерашната прес-конференција портпаролот на ССМ Пеце Грујовски.
ССМ очекува приватниот сектор да ги искористи средствата што ќе ги добие од намалениот персонален данок и придонесите за покачување на платите на вработените.
„Во Македонија од просечната плата која изнесува 15.759 денари, дури 80 проценти се издвојуваат за прехрана, а само 20 проценти или педесетина евра остануваат за останатите потреби, за кои може слободно да кажеме дека се потребни две просечни плати“, рече Грујовски.
Како приказ за лошите состојби во земјава, тој направи споредба и со останатите земји во Европа, каде што, како што рече, во просек само 13 проценти од просечните примања се користат за исхрана, а 30 за комуналии.
„Во Скопје за стан од 60 квадратни метри се плаќа 44 евра, во Загреб - 33 и тоа со користење и топла вода, а во Белград - 35 евра. Во Македонија овој износ се плаќа со просечна плата од 250 евра, во Хрватска со 694, а во Србија со просечна плата од 425 евра“, истакна Грујовски.
ССМ реагира и на висината на платите што ги добиваат оние кои работат, бидејќи како што рече, од вкупниот број вработени, кој изнесува 532.570, дури 422.532 земаат плата под државниот просек, како и на нередовноста на исплата на платите со што се соочуваат дури 10 проценти од вработените.
Грујовски информираше дека синдикатот деновиве упатил писмо до Владата со барање да бидат преземени итни интервентни мерки заштита на стандардот на граѓаните.
Изразувајќи несогласување со убедувањата на министерот за финансии дека инфлацијата е под контрола, Грујовски посочи дека најдобар барометар може да биде првата продавница, каде што може да се направи споредба колку продукти можеле да се купат за 1.000 денари лани, а колку оваа година.
(МИА/Макфакс)
|
