Живи врби среде Вардар ќе го раззеленуваат „Скопје 2014“

Министерството за култура бара фирма што ќе ја изгради конструкцијата за дрвјата во вид на саксии

Деспина Трајковска

Освен палмите, фонтаните и двата нови моста, Вардар ќе го красат и три живи врби поставени среде. Ќе се издигнуваат од водата благодарение на бетонски конструкции слични на саксии. Овој одамна најавен, па речиси заборавен проект, дефинитивно, ќе се реализира. Министерството за култура веќе бара фирма што ќе ги изведе градежните работи. Извесно е дека новата декорација загадениот Вардар ќе ја добие до крајот на годинава иако неколкупати досега експертите укажуваа дека проектот е реално изводлив, но не може да се даде гаранција за сигурноста на дрвјата и на другите придружни елементи поради непредвидливиот Вардар. Истовремено, некои потенцираа дека избраната локација нема соодветна подлога за поставување на конструкциите и виреењето на растенијата. Сепак, надлежните не се откажаа од намерите.

„Овој проект е дел од проектот за поставување 35 скулптури во централното градско подрачје, а идејното решение кое ќе се реализира беше избрано на конкурс во 2008 година. Станува збор за проект на авторката Искра Димитрова“, информираа вчера кусо од ресорното министерство, без да одговорат колку пари се предвидени да се потрошат за оваа намена. Истовремено, дополнија дека врбите и портата се единствени скулптури што останаа да се постават како дел од проектот за 35 скулптури што почна да го реализира Министерството пред две години.

Според објаснувањето на авторката Димитрова, трите врби е замислено да се постават на бетонски конструкции слично на саксии. „Со моето идејно решение предвидов врбите поставени во бетонски конструкции да се наоѓаат паралелно на кулите лоцирани до ГТЦ. Бетонските основи би биле така изведени да личат на саксии, широки по два метра“, објасни Димитрова за „Утрински весник“ кога јавноста беше информирана за целиот проект на Министерството. Таа објасни дека токму футуристичката нишка на овој проект, од една страна, и предвизикот во центарот на градот да се даде печат на вегетацијата која се' помалку ја има во централното градско подрчаје, биле предизвик за неа при изработката на проектот. Напомена дека ги избрала врбите како синоним на реката, а Вардар како белег на Скопје, кој, всушност, ќе претставува природна средина за дрвјата. Димитрова потенцираше дека со идејното решение за врбите, кое е еден вид споменик, ќе се оддаде почит на вегетацијата на Скопје.

„Сакав да создадам нешто да има свој израз и автентичност за градот, сето тоа на еден посовремен начин. Во проектот, бетонот како суровост на урбаниот материјал го спротивставив на романтичниот аспект на врбите. Притоа водев сметка тие да не го попречуваат погледот на Камениот мост, бидејќи тој е еден од главните симболи на Скопје, а сепак да дадат доза на веселост на урбаниот пејзаж“, дообјасни Димитрова за „Утрински“.