Телефонски побарај да ти асфалтираат дупка

Дупките по скопските улици ќе се поправаат по пријава лично од граѓаните. Така барем ветуваат градските власти, односно Јавното претпријатие „Улици и патишта“ кое најчесто интервенира кога се во прашање ситни поправки на градските и општинските улици. Планираната акција веќе се рекламира и по билборди.

Порака „пријави дупка на 15300 !“ деновиве среќаваат скопјани по „Илинденска“ и по неки други локации. Иако телефонскиот број веќе е во функција, теренците се' уште не почнале со реализација на акцијата. Се очекува пополнувањето на дупките по пријава од граѓаните да стартува за десетина дена.

Засега, на телефонскиот број љубезно ја објаснуваат постапката и порачуваат дека од понеделник се' ќе биде дефинирано. Тогаш ќе се знае точно за кои улици граѓаните ќе можат да побараат интервенција, дали ќе има потреба само од затворање на дупка, или, пак, екипи на „Улици и патишта“ ќе вршат и покрупни зафати. Детаљите за акцијата, како што најавуваат од претпријатието од идната недела ќе бидат објавени и на неговата в��б-страница. Таму ќе биде наведена и листата на улици за кои ќе може да се побара одреден зафат.

Граѓаните што веќе се информирани за акцијата позитивно ја оценуваат најавената кампања. Особено оние од Кисела Вода велат дека сега конечно ќе имаат каде да се пожалат на раскопаните улици во населбата. Сепак, дали и тие се на списокот за можна интервенција, ќе се знае од наредната недела. Надлежните треба да разграничат дали кампањата ќе ги опфати сите улици низ Скопје, односно дали градското претпријатие ќе интервенира само на градските улици, на оние по кои поминува автобус, или и на собирните, односно на општинските. (Дс.Т.)