Што прават денеска

Дејан Павлески

менаџер на клуб „Матица“

По вчерашните промоции на книгите „13 часа“ од Дион Мајер и „Обраќања“ на д-р Срѓан Керим, денов ќе си го посветам на себеси и на моите најблиски. Што се однесува до работата, релаксирано ќе ги составувам новите планови за реализација во периодот септември-јануари. Се разбира, семеен ручек и вечерна прошетка со Бранка и Јана.

Пламенка Трајковска

виолинистка

Првата обврска претпладнево е пробата со гудачкиот квартет „Марија“, со кој вечерва од 23 ч. имам настап во Куршумли-ан, во рамките на манифестацијата „Звуците на чаршијата“. Попладнето е за семеен ручек и малку одмор, па штом падне ноќта, започнуваат повторно подготовките за вечерашниот настап.

Зоран Николовски

туристички менаџер

Првото кафе го пијам со колегите во Министерството за економија, пред да започнеме со обврските околу тековните проекти за развој на туризмот. Во 11 ч. имам состанок во Собрание на град Скопје, за реализација на културните настани во градот. Попладне, ако е убаво времето, одам на адреналинска прошетка со мотор. Вечерта е за семејството.