Канческа-Милевска да поднесе оставка

Министерката за култура Елизабета Канческа-Милевска да си поднесе оставка или да биде разрешена. Во спротивно, СДСМ ќе поднесе интерпелација.

Ова во името на опозицијата вчера го побара членот на Извршниот одбор на СДСМ, Игор Ивановски, потенцирајќи дека нивните досегашни докази за отворениот случај „Патриотска метла“ се доволни за министерката да понесе одговорност.

Ивановски посочи дека мегааферата покажала дека во Министерството исчезнал дел од тендерска документација и дека Канческа обидувајќи се да ја избегне сопствената одговорност се служи со лаги и манипулации. „Наместо министерката со денови да се крие зад фасцикли, регистри и нервозно и конфузно да прави театар, треба конкретно да одговори. Зошто не ги покажа понудите и конкурсните трудови за седум завршени тендери на кои се избрани фирми и кои се платени со народни пари? Говориме не за поништени, туку за седум важечки тендери“, потенцираше вчера Ивановски, според кого, и потврдата од МВР дека е поднесена пријава за исчезнати документи од Министерството за култура, претставува доказ за „патриотската метла“.

Од Кабинетот на министерката вчера накусо информираа дека за нив случајот е затворен и дека на јавноста и' ја презентирале целокупната документација за случајот.

„Со Игор Ивановски-Шема ќе се видиме на суд врз основа на двете кривични пријави за клевета што веќе ги поднесовме, и тоа за наводно исчезнување на ‘документација од милионски суми‘ и за ‘склучување договори во четири очи‘“, дополнија од Кабинетот на министерката. (Дс.Т.)