Контролорите во ЈСП казнуваат за поголеми плати

Односот спрема патниците е понижувачки, иако најчесто тие воопшто не се виновни

Снежана Калабакова


Ако не сакате да бидете понижени и обвинети дека се шверцувате во автобус на ЈСП, внимавајте кога го поништувате билетот на влегување. Ако поништувачот лошо го поништи билетот, а вие не го забележите тоа и ако ја имате таа среќа да влезе контрола, сигурно е дека грешката, иако не ваша, ќе ве чини скапо. Зашто, контролорите на ЈСП како да работат на процент, ќе ве казнат без око да им трепне. Оти, колку повеќе казни напишат, толку поголема плата ќе земат.

Но, не само што казнуваат, туку нивниот однос спрема патниците е за секаква критика. За технички пропуст на сопствените поништувачи ги напаѓаат патниците. Дрско и безобразно со највулгарни зборови јавно ги линчуваат граѓаните. Љубезниот однос спрема патниците кои секогаш се во право, барем според кодексот на однесување до кој би требало да се придржуваат сите еднакво, за контролорите очигледно не важи. Тие казнуваат и чесни граѓани што си платиле билет и никогаш во животот ниту помислиле, а не да се обидат, пак, да се шверцуваат во автобус.

За да казнат, на контролорите им е доволно поништувачот да не го отчукал добро билетот, иако патникот смета дека со неговиот билет е в ред. Тогаш на сцена стапуваат контролорите. Веднаш почнуваат да мавтаат со најстрогата казна од 6.000 денари. Во најдобар случај, затечениот граѓанин може да се испазари и на лице место да плати само 200 денари. На ваков начин контролорите процентуално си ја зголемуваат платата. Тие, инаку, добро знаат кои се шверцерите и веројатно уште подобро се информирани на кои линии се поприсутни. Ваквите напади врз граѓаните се со една цел - колку повеќе казни, толку поголема плата. Мотив за казнување им се и лошо поништените билети од рацете на возачот, кој ги поткинува билетите кога му се блокира поништувачот.

„Возејќи се во број ’15‘, доживеав невидена атака од контролор-насилник. Со уредно поништен билет за пет возења, контролорот, не можејќи да евидентира што е отпечатено, дрско ми побара лична карта. Не сфаќајќи што се случува, побарав образложение, но неговото хулиганско однесување го привлече вниманието на сите патници. Почна да ми пишува казна за суд, кога неговиот колега ми понуди друга опција – да платам во автобус. Се најдов буквално затечена. Се почувствував мизерно и без збор му платив 200 денари, иако и самата не знаев зошто. Никогаш не ми паднало на ум да се шверцувам, а камоли некаков примитивец да процени дека имам таква намера. Друг пат никогаш нема да влезам во автобус на ЈСП“, објасни Маријана Симоновска.

Директорот на ЈСП „Скопје“, Мишо Николов, вели дека за контролорите допрва ќе следува обука како треба да се однесуваат спрема патниците. Обуката ќе ја спроведувал лично тој! Потврдува дека претпријатието се соочува со финансиски проблеми и дека негова била директивата колку повеќе казни ќе наплатат контролорите, толку повеќе ќе им се зголеми платата. Но, додава дека кодексот на однесување ги обврзува да бидат љубезни и културни спрема патникот. Тој вели дека ваквото однесување нема да го толерира и дека тоа, всушност, е резултат на неодамнешното намалување на платите откако неговиот претходник, Александар Бошковиќ, и поранешниот градоначалник Трифун Костовски ги израмниле со платите на лекарите. „Реформите болат, но мора да се спроведат“, вели Николов.