Насловна

Поглед

Блиски Исток во Македонија

Слободанка Јовановска

Има ли новинар во авионот? Со вакво прашање на социјалните мрежи беше прокоментиран молкот првиот ден околу усмртениот Мартин Нешковски во повеќето медиуми во Македонија. Тоа што требаше да биде ударна вест за секое нормално новинарство во светот, кај нас требаше да завр��и како рутинска информација, па и да ја нема.

Да, ама во некои други времиња. Не во овие кога традиционалното новинарство веќе ја нема моќта и ексклузивноста што ја имаше некогаш. На Македонија очигледно и' се случи Блиски Исток, бидејќи обидот да се испреврти информацијата и да се прикрие вистината се издиша и пред да почне. Единствен начин да се запре овој тренд, што во светот веќе го доби името „граѓанско новинарство“, е социјалните мрежи да се укинат, а тоа е мрак што не можеше да си го дозволи ни Моамер Гадафи, иако го бомбардираат.

Се покажа дека ниту еден медиум не може да открие толку колку што во изворна, иако непроверена форма и, можеби, под некакви влијанија, можат да понудат „Фејсбук“ и „Твитер“.

Странскиот блог-сајт „Глобал воис“ вчера ги објави предупредувањата, всушност, заканите од Министерството за надворешни работи дека ги следат групите што се организираат околу полициската бруталност на „Фејсбук“ и на интернет и дека тоа не е се' - бидејќи некои од нив веќе се блокирани. МВР може да блокира колку сака, но социјалните мрежи ќе си го најдат патот повторно, како што покажа искуството во арапските земји.

Во светот годинава главните вести не ги пренесоа први ниту агенциите, ниту Си-Ен-Ен, ниту Би-Би-Си, туку видеоснимките на анонимци што се најдоа на местото на настаните. Окото и камерата на граѓаните се насекаде, а пристапот до јавноста е неограничен. Добре дојдовте во Македонија, прва земја во светот што се пофали дека станала безжична интернет-држава.