Поглед

Светско чудо за три дена

Јасминка Павловска

Речиси само еден месец по заминувањето на нуркачката експедиција од светски калибар, што ја истражуваше подводната пештера Врело кај Матка, овој ексклузивен природен локалитет е на работ на еколошка катастрофа. Поради ремонтот на хидроцентралите на ЕЛЕМ и паднатото ниво на водата на езерото, денешната слика и услови на теренот ни оддалеку не се во репрезентативна форма за влегување во друштвото на новите седум светски чуда на природата, за што пред само три месеци Врело беше во номинација и освои завиден пласман. Експедицијата што ја истражуваше оваа подводна пештера кај Матка, нуркачите Луиџи Касати од Италија и Марк ван дер Мулен од Белгија, успеа да нурне и да ја истражи пештерата до 190 метри во длабочина, а се претпоставува дека длабочината може да биде и 300 метри.

Сегашниот резултат од истражената длабочина на Врело е извонреден. Според досегашните истражувања, оваа водена пештера е 18. најдлабока истражена пештера во светот. На овој список се и пештери кои се истражувани и сонарно, односно со помош на техника. Од оние во кои е нуркано од човек, Врело е сега на 14. место во светот, а на 5. во Европа. Нуркачите заминаа годинава од Македонија со план да се вратат идната година и да продолжат со истражувања.

Но, во сегашниве очајни еколошки услови на Матка, нуркачите тешко би го препознале Врело од пред четириесетина дена. Домашните нуркачи, кои го подготвуваа теренот и го чистеа влезот во пештерата пред доаѓањето на интернационалната експедиција, постојано се жалеа дека имаат проблеми со одрони на камења од изградбата на хидроцентралата „Козјак“. Тогаш имаа само проблем, а сега Врело не можат да го препознаат.

Се чини дека нашата амбиција за влез меѓу седумте светски чуда е само чудо за три дена.