Измените ќе ги прави истата редакција

Невена Поповска

Истата редакција што ги работеше определниците ќе ги направи и измените во Македонската енциклопедија. Ова за „Утрински весник“ вчера го изјави главниот редактор на енциклопедијата, академик Блаже Ристовски. Во коригирањето на енциклопедијата ќе учествуваат и стручни лица од другите етнички заедници во Македонија.

Сепак, академиците-Албанци бараат нивните колеги од МАНУ целосно да се дистанцираат од фактите наведени во енциклопедијата, а ова дело да биде повлечено. Еден од нив е и академикот Али Алиу, кој вели: „Таа омраза никому не му треба, таа омраза само ги вдлабочува нетолерантноста и враќа некои години и денови за кои сме биле убедени дека се надминати“.

Тешки зборови за инкриминираните делови од енциклопедијата вчера се слушнаа на дебатата во Институтот за политички и интеркултуролошки студии. Според директорот на Институтот, Ризван Сулејмани, „никогаш досега еден проект, кој има цел да да ги претстави фактите и реалноста на Република Македонија, не предизвикал конфузија и револт кај поголемиот дел од албанското население во Македонија, но и пошироко. Реакциите од страна на интелектуалците, невладините организации, но и на политичките партии ја усложнија целата ситуација и ја поттикнаа потребата за една научно-теориска дебата за овој проект. Медиумската дебата ги преминува границите на една научно-теориска полемика и од ден на ден претставува закана за влошување на меѓуетничките односи, но и влошување на односите со соседните земји“, нагласи Сулејмани.

„Битно е целокупниот тираж од првото издание да биде коригиран и определниците за албанската историја и македонско-албанските односи одново да бидат напишани врз професионална основа и со користење на соодветната методологија и релевантни извори“, истакна на дебатата професорот Владо Поповски.

Според него, во пишувањето на спорниот дел од енциклопедијата не биле вклучени албанолози и не биле користени релевантни извори. „Енциклопедијата е создадена од скрибери“, рече Поповски, кои немале увид во релевантна документација и не користеле повеќе извори во однос на албанската историја и култура. Според него, делото е создадено од некомпетентни автори.

Академикот Али Алиу порача дека треба да се најде интелектуален начин да се надмине несреќата - Македонска енциклопедија. Тој наведе дека проектот Македонска енциклопедија повредил дел од граѓаните во земјата и предизвикал штета за државата. „МАНУ треба да најде сила да се дистанцира од првото издание, а при изготвувањето на новото да бидат вклучени релевантни академици и луѓе со поинаков менталитет и научна коректност“, рече Алиу.

Помош за пишувањето на Македонската енциклопедија понуди и Албанската академија на науките. Ова го потврди и академик Али Алиу, кој истакна дека „неговите колеги од Албанската академија би помогнале околу записите што се однесуваат на албанскиот народ и историја, а кои треба да се содржани во коригираната енциклопедија“.

Академик Колец Топали, член на Албанската академиј��, изјави дека најмалку што требаше да понуди Македонска енциклопедија е во неа да има историски факти и да провејува дух на толеранција. (Н.П.)