Арачиновка фрлила експлозив во Социјално

Љубиша Станковиќ

Арачиновка фрлила експлозивна направа во Социјално, бидејќи не и' дале социјална помош. Инцидентот, според полицијата, се случил завчера околу 13 часот во барака во кругот на Општина Гази Баба. Арачиновката, само неколку минути пред активирањето на направата, примила решение со кое и' била укината социјалната помош. Незадоволна од таквиот развој на настаните жената ја напуштила канцеларијата, а потоа преку прозорецот ја фрлила направата.

Скопската полиција вчера цел ден го вештачеше материјалот што бил подигнат од просторија на Центарот за социјална помош од фрлената направа никој не бил повреден и е предизвикана незначителна материјална штета. Но, чадот и искрењето предизвикале паника и вознемиреност кај вработените.

Од Министерството за внатрешни работи, во очекување на прелиминарните резултати од вештачењето, потврдуваат дека првичните наоди говорат дека станува збор за направа со цилиндрична форма, дека „експлозивната направа“ не содржела метални делови, односно дека е можно да е изработена од картон, што, пак, упатува на заклучок дека е можно да се работи за петарда.

„Се' уште ги чекаме официјалните резултати од вештачењето. Полицијата го знае идентитетот на жената и сега се трага по неа“, вели портпаролката на СВР - Скопје, Лиза Бендевска.

За овој настан вчера со свој став се произнесе и Министерството за труд и социјална политика. Оттаму појаснуваат дека лицето Х.Р. поднело барање до Центарот за социјална работа - Гази Баба за остварување право за социјална парична помош.

Поради утврдување на фактичката состојба на барателот, стручните служби од центарот два пати биле на наведената адреса, со цел да стапат во контакт со барателот на правото, но и во двата обида не ја нашле странката на наведената адреса. (Љ.С.)