За фасадата на „Филип Втори“ ќе се потрошат 15 млн. евра

За трибините и за фасадата - 30 милиони евра, другите 30 не се знае

Сања Наумовска
Сашко Ѓ. Димовски


Половина од парите од вториот проект за реконструкција на арената „Филип Втори“ ќе се потрошат за трите трибини (западна, источна и јужна) и за фасадата. Од вкупно 60 милиони евра, колку што се планираат да се инвестираат до 2013 година за целосно довршување на стадионот, 30 милиони евра ќе отидат за изградбата на двете трибини и за реконструкција на јужната и за фасадата. Остатокот ќе се дели за уредување на поттрибинскиот простор, како и за целосно обновување на теренот.

Во минатата година беше завршена северната трибина, која од корен се реконструираше и сега има капацитет да прими 10.030 гледачи. За неа Јавн��то претпријатие за стопанисување со станбен и деловен простор потроши околу 12 милиони евра.

Околу 16 милиони евра се наменети за реконструкцијата на јужната и изградбата на западната и источната трибина. На нив во иднина ќе можат да седнат вкупно 23.469 гледачи. За фасадата заедно со илуминацијата ќе бидат потрошени околу 15 милиони евра, кажуваат податоците од Јавното претпријатие. Во вкупната бројка од 60 милиони евра не се вклучени и еден милион долари, кои УЕФА и' го донира на Македонската фудбалска федерација за реконструкцијата на јужната трибина.

Засега не се прецизира на кои ставки ќе се распределат останатите 30 милиони евра. Постојат готови проекти за обновување на зелениот дел од теренот со нов дренажен систем, како и изградба на атлетска патека. Колку за споредба, модерната патека (најсовремена во Македонија), која е изградена во СРЦ „Билјанини Извори“ во Охрид чинеше околу 500.000 долари.

Дополнителни средства ќе бидат наменети и за средување под трибините, каде што на исток и на запад ќе има деловни простории, а под северната трибина хотел, теретана, амбуланта, ресторан и друго. Во сметките не влегуваат проектите за паркирање и за пешачки мост на Вардар, кој ќе води кон катната гаража.

Исток и запад се прават одново и ќе бидат на три нивоа, додека, пак, јужната се реконструира, ќе се заменуваат столчињата и ќе се обновува ентериерот. Според пазарните цени, едно столче чини меѓу 8 и 10 евра, вклучувајќи ги и парите за монтирање, но без трошоците за металната конструкција на која се прицврстуваат. Тоа значи дека столчињата за јужната трибина нема да ја надминат сумата од 150.000 евра. На овие средства треба да се додадат и парите за монтажа и металната конструкција, што се' на се', би било некаде околу 200.000 евра. Ако изградбата на западната и источната трибина чини заедно најмногу 12 милиони евра (колку и северната) прашање е каде ќе се потрошат четирите милиони евра за реконструкцијата на јужната трибина, и тоа само на оној дел каде што има гледачи затоа што поттрибинскиот простор е сопственост на „Силекс“.

Според проектите за следната година, ќе се менува и тревната подлога, за која исто така, нема точна бројка колку ќе чини. Неофицијално, еден квадратен метар бусен природна трева чини меѓу 7 и 10 евра. Теренот на „Филип Втори“ е со димензии 108 на 72 метра, или 7.700 квадрати (околу 70.000 евра). Сите четири трибини ќе имаат покривна конструкција со двослојни и трислојни поликарбонатни плочи, какви што моментално има на северната трибина, рефлектори од марката „филипс“ со 1.600 лукса, потребната јачина на светлост за одигрување фудбалски натпревари во вечерен термин.

Во трошоците влегуваат и системите за мониторинг и семафорите. (С.Н.-С.Д.)