Војниците се жалат на притисоци од Министерството за одбрана

МO демантира дека им се заканувало на војниците и сметаат дека тука била вмешана политиката

Светлана Унковска

Професионалните војници кои веќе десетина дена се на протест пред Владата се жалат дека повторно се соочуваат со притисоци од Министерството за одбрана. Методите и интензитетот на притисоците особено биле засилени по саботниот протестен марш. Војниците се повикувале поединечно и од нив се барало да се изјаснат дали членуваат во Независниот синдикат и колку се активни на протестот и добивале закани дека поради тоа би можело да бидат отпуштени од работа или оти нема да им бидат продолжени договорите. Министерството за одбрана ги отфрла ваквите обвинувања и тврди дека во ваквите реакции на војниците е вмешана политиката.

„Очигледно е дека поради нашиот протестен марш, кој го одржавме во саботата, се зголеми притисокот врз луѓето. Деновиве се бара поединечно од војниците да се изјаснат кој е поактивен член во Независниот синдикат. Се закануваат со отпуштања од работа, со непродолжување на договорите, а некои војници добија и прекоманди. Исто така, за какви било потреби на војниците им се поставуваат услови да не се членови на синдикатот“, обвинува Веле Крбалевски, претседател на Независниот синдикат на професионалните војници. Тој додава дека намерата била преку различни форми на притисоци да се натераат војниците да се откажат од протестот и да се повлечат од пред Владата. За сето ова, велат тие, писмено ги известиле канцеларијата на Европската унија и на амбасадата на САД во земјава и очекуваат деновиве да остварат средби за лично да ги информираат претставниците на меѓународната заедница.

Од Министерството за одбрана ги отфрлаат ваквите обвиненија како неточни и бараат од војниците да посочат кој им врши притисоци.

„Категорично отфрламе дека има какви било притисоци од страна на Министерството за одбрана кон професионалните војници. Доколку има, ги повикуваме војниците да кажат за какви притисоци станува збор и со име и презиме да наведат од кого точно доаѓаат. Истовремено, жалиме што мал дел од професионалните војници е вмешан во политиката, со што тие го нарушуваат имиџот и угледот на АРМ“, изјави Сашко Димов, портпарол на Министерството за одбрана.

Професионалните војници веќе десетина дена се на протести пред Владата барајќи решавање на нивниот статус. И покрај тоа што инсистирале да се сретнат со премиерот Никола Груевски, досега никој не ги примил. Од досегашните средби со министерот за одбрана Зоран Коњановски не се задоволни, бидејќи не е постигнат никаков напредок во однос на нивните барања. Тие се револтирани и затоа што Министерството за одбрана вработило околу 250 лица, иако војниците повеќе години бараат да им се реши проблемот што остануваат без работа. Тие бараат, откако ќе ги исполнат условите поради кои не можат повеќе да бидат активн�� војници, да бидат вработени во одделни сегменти во Министерството или во Армијата. До крајот на годинава на околу стотина професионални војници им истекува правото да ги продолжат договорите за работа.