Поддршка за помалите етнички заедници

ТЕТОВО - Лидерот на ДУИ, Али Ахмети, им даде условна поддршка на лидерите на партиите од помалите етнички заедници за нивниот предлог да има десет загарантирани пратенички места во Собранието за припадниците од помалите заедници. На двочасовната средба што се одржа во седиштето на ДУИ во Мала Речица, Ахмети ветил дека неговата партија ќе го поддржи предлогот, но единствено ако со тоа не се влијае врз Бадинтеровиот принцип на гласање. „ДУИ не е против унапредувањето на малцинските права, но не сакаме овој предлог да влијае врз Бандетеровиот принцип на гласање. Им гарантирав дека ќе ги поддржам, но само ако најдат клуч да не се загрози Бадинтеровиот принцип. Останува партиите да најдат решение и модалитети како предлогот да се спроведе во реалност“, рече Ахмети.

На средбата во седиштето на ДУИ имаше претставници од партиите на Србите, Турците, Ромите, Власите и Бошњаците. (Д.Р.)