Трамвајот е во рацете на унгарско-англиска компанија

Консултантот треба за една година да направи студија, проект и да најде ��онцесионер за изградба на трамвајот

Унгарската компанија „Вијалто консалтинг“ и Британците од „ЕЦ Харис ЛТД“ ќе ја изработат студијата, која ќе ја покаже оправданоста на проектот трамвај во Скопје. Од седум пристигнати понуди, Градот ја избра оваа заедничка понуда за која ќе плати 200.000 евра. Согласно со договорот, консултантите имаат рок од една година за да направат студија и проект и да најдат фирма концесионер што ќе го гради трамвајот.

„Ќе се работи фазно, а во првата фаза треба да се изработи целосна студија за концесинирање на трамвајскиот превоз. Во втората фаза ќе се изработува тендерската документација за концесионирање и ќе се ангажира на деловна афирмација на проектот во меѓународни рамки.

Во завршната фаза фирмата ќе се ангажира околу изборот на концесионер, изработката на договор за концесионирање, како и за неговото склучување“, објаснуваат градските власти.

Англиско-украинската студија, всушност, ќе биде втора студија што ја нарачуваат градските власти за проектот трамвај. За време на мандатот на претходниот градоначалник, Трифун Костовски, беше нарачана физибилити-студија, но, според Коце Трајановски, таа не е соодветна за реализација на целиот проект со оглед на фактичката состојба со инфраструктурата во градов.

Од Град Скопје информираат дека „ЕЦ Харис“ е една од доминантните англиски консалтинг-групации во областа на шинскиот превоз што досега проектирале и реализирале повеќе меѓународни проекти. „Вијалти консалтинг“, пак, е една од водечките компании на унгарскиот пазар за проектирање и изведба на шински линии. (Б.Ш.)