Насловна

Секој трет Македонец живее во сиромаштија

Најсиромашни се лицата без никакво образование. Тие зафаќаат 62,3 отсто од вкупниот процент на сиромашни

Маја Томиќ


Животот станува се' полош. Граѓаните го чувствуваат тоа на своја кожа, а сега и статистиката потврди. Лани стапката на сиромаштија изнесувала 30,9 отсто, или речиси секој трет Македонец бил сиромашен. Тоа е за 2,2 отсто повеќе отколку во 2008 година кога сиромаштијата беше измерена на 28,7 проценти. Најпогодени, како и секогаш, се невработените, помногубројните семејства, оние што немаат никакво образование и повозрасните лица. Сиромаштија лани била пониска за незначителни 0,2 отсто во споредба со 2009 кога таа беше 31,1 процент.

И покрај малиот пад на стапката на сиромаштија, најголем процент од граѓаните не мислат дека лани живееле подобро отколку една година претходно. Најмногу, или 42,8 отсто од анкетираните семејства, се изјасниле дека живееле полошо од пред една години, затоа што, главно, не можеле да ги задоволат потребите со своите месечни приходи. Само 0,6 отсто од домаќ��нствата рекле дека во 2010 година живееле многу подобро отколку во 2009, додека најголем процент, или 45,8 отсто, рекле дека живееле исто. Многу полош бил животот за 15,5 отсто од анкетираните. За покривање на минималните месечни потреби, најголем процент, 43,2 отсто, се изјасниле дека им се потребни повеќе од 30.000 денари месечно, додека просечната плата во земјава изнесува нешто над 300 евра или 20.585 денари. „Не ни треба статистиката, за да ни го потврди она што секојдневно го чувствуваме, а тоа е дека живееме се' полошо. При исти плати со години, а со постојано зголемување на сите животни трошоци, како може да ни биде подобар животот. Јас и сопругот работиме, имаме две школски деца, а земаме по 200 евра плата. Што попрво да платиме, дали сметки, дали храна, облека и многу други секојдневни работи. Едвај врзуваме крај со крај во месецот. А, што да кажат оние што се без работа. Тешко нив. “, вели скопјанката Марија Т.

Како најсиромашни во минатата година, Статистика ги регистрирала домаќинствата со деца, или дури 39,2 отсто од вкупниот број на сиромашни. Најмалку сиромашни се оние без деца, 25,8 отсто. Во споредба со 2008 година, стапката на сиромаштија кај домаќинствата со деца лани е зголемена за дури 5,5 отсто. Како и во досегашните статистички показатели, најсиромашни се најбројните семејства со 6 и повеќе членови кои зафаќаат 42,8 отсто од вкупниот процент на сиромашните. Кај повозрасните лица со над 60 години е измерен најголем процент на сиромашни или 32,8 отсто. Невработените, како и секогаш, се посиромашни од другите. Минатата година 41,8 отсто од оваа група на граѓани биле сиромашни, односно 44,8 отсто од сите сиромашни се невработени. За разлика од нив, најмал е процентот на сиромаштија кај семејствата со двајца или со повеќе вработени - 20,6. Најсиромашни се лицата без никакво образование, тие зафаќаат 62,3 отсто од вкупниот процент. И обратно, за разлика од нив, тие со високо образование се најмалку сиромашни - 13,6 отсто. Во Скопје е најмала сиромаштијата, само 6,9 отсто, додека во руралните средини таа изнесува 54,1 отсто.

Во изминатите 20 години Македонија никако да се ослободи од баластот наречен сиромаштија кој од година во година се продлабочува. Овој феномен стана еден од главните проблеми во државава на почетокот на транзицијата, а досега бројките за повеќе од десет пати се зголемени. Само за потсетување, во деведесеттите години на минатиот век стапката на сиромаштија изнесуваше само 2 процента. Во 1997 година, кога Статистиката ги направи првите мерења за степенот на сиромаштијата, таа достигна 19,1 отсто, во 1998 година - 20,7, во 1999 година, 21, а во 2001 година, кога беше донесена Стратегијата за намалување на сиромаштијата со помош на Светска банка, таа загрижувачки скокна на 24,6 проценти.

Ниту една влада досега не успеа да се справи со овој горлив проблем. Според професорката на ЈИЕ, Шенај Хаџимустафа, потребни се конкретни стратегии и мерки, за да има резултати. „Секоја влада мора да се фокусира кон најранливите групи граѓани, невработените и необразованите, затоа што кај нив е највисок процентот на сиромашни. Тие треба да се вклучат во општеството преку образовниот и здравствениот систем за да најдат работа и да не бидат социјален товар на државата. Тоа што расте сиромаштијата во земјата покажува дека не сме на вистинскиот пат, дека досега не биле носени соодветни квалитетни мерки на среден и на долг рок“, вели Хаџимустафа.