Како Треневски ги замислува НАТО-интеграциите

Политичката и експертската јавност оценуваат дека Треневски е само добро вклопена коцка во владиниот мозаик

Светлана Унковска

По неодамнешниот скандалозен настап на новонаименуваниот амбасадор во НАТО, Мартин Треневски, пред Комисијата за надворешни работи, премиерот Никола Груевски се обиде да ја смири јавноста тврдејќи дека не е така како што изгледа. Тој убедуваше дека идниот дипломат во Брисел не се изразил најдобро, дека станува збор за несоодветен вокабулар и не бил доволно добро разбран. Поради тоа, лично премиерот Груевски му го најави интервјуто на Треневски во кое тој ќе ги разјаснел работите. Ако по логиката на нештата би требало да се очекува дека Треневски ќе излезе со видоизменети тези, сепак, тоа не само што не се случи, туку тој ги запечати и своите ставови, но и владините определби. Во петочното интервју дадено за агенцијата Макфакс, тој целосно ги симна маските со

констатацијата дека неговите ставови целосно „се вклопени во рамките на стратегиските определби на Владата и приоритетите на државната надворешна политика во која НАТО-интеграцијата зазема врвно место“.

Со дипломатски речник и Стејт департментот и' забележа на Владата за несериозниот однос кога во седиштето во Брисел одлучила како амбасадор да испрати личност што има анти НАТО-ставови, но и елементарни непознавања на принципите на Алијансата. Шлаканицата за освестување што ни ја Вашингтон испрати, јасно става на знаење дека доколку Владата не се огради од овие ставови (што, веројатно, значи негово повлекување), тогаш ќе се смета дека и Владата на чело со премиерот Груевски не се заинтересирани да ја внесат Македонија во НАТО.

Политичката и експертската јавност воопшто не се изненадени од тоа што Треневски не отстапил од своите ставови. Едноставно, се прашуваат зошто би требало да се очекува идниот НАТО-амбасадор да соопшти поинакви ставови, кога тие се прифатени и од министерот за надворешни работи и од Владата, па оттука, тој е само добро вклопена коцка во владиниот мозаик.

„Зошто се очекуваат поинакви ставови, не ми е јасно. Мислам дека треба малку погенерално да гледаме на работите, а не да оставаме политичарите да не' водат од еден ексцес во друг. Ако премиерот по последната средба со грчкиот премиер ни кажа дека барањата што ни ги поставува Грција ниту една Влада нема да ги исполни во наредните сто години и дека нашата политика кон Грција ќе биде да и' помогнеме да сфатат дека ние сме она што сме, е тогаш мислам дека тоа претставува добар сигнал за разговори за суштинските проблеми. И второ, да се каже како Грците ќе ги натераме да се откажат од своите гледишта и да ги прифатат нашите. Ние бегаме од суштинските теми и не разбираме дека, всушност, именуваниот амбасадор перфектно се вклопува во целата слика“, вели професорот Денко Малески, кој е убеден дека во целиот овој развој на настаните постои кохерентност, а не ексцес на амбасадорот.

Професорот Малески го оценува настапот на Треневски пред Комисијата за надворешни работи како чисто непознавање кога најави дека со стапувањето на должноста има намера да го оспори принципот на солидарност на членките на НАТО и да бара корекција на завршното коминике од Самитот во Букурешт.

„Од азбуката на политиката требаше досега да биде јасно дека сојузите се создаваат за да ги бранат интересите на своите членки, а не да ги

задоволуваат аспирациите на оние што сакаат да станат членка. Тоа што го гледаме се детски работи што можат само да и' наштетат на државата“, оценува Малески.

Но, се чини дека Владата многу малку им придава значење на пораките што ги добиваме од меѓународниот фактор и кои веќе имаат сериозна содржина. Предупредувања и забелешки дека сериозно заостануваме на патот кон нашето зачленување во НАТО ни пристигаат и поради тоа што Македонија во последниве години драстично го намали армискиот буџет. Поранешниот министер за одбрана, Владо Бучковски, критикува дека власта со сите потези и одлуки ја оддалечува Македонија од НАТО.

„Не е проблем само Треневски, тој е само експонент на оваа погрешна политика. Ние, очигледно, од интеграциите во НАТО направивме од готово вересија, и тоа поради погрешните политики на Никола Груевски и на ВМРО-ДПМНЕ. Наместо да се модернизира и да се реформира армијата, ние ја милитаризиравме полицијата. Со тоа направивме груб упад во една од најуспешните реформи што ги имавме. Јас сум убеден дека во агендата на оваа Влада нема место за нашето членство во Алијансата“, критикува Бучковски. И тој смета дека случајот со именувањето на амбасадорот Треневски е само уште една епизода испланирана од премиерот Груевски.

„Тие не можат да побегнат од некои факти, а тоа е дека оваа гарнитура на ВМРО-ДПМНЕ е синоним на анти НАТО-политика. По реакцијата на Стејт департментот мислам дека и тие не можат да поверуваат што се случува со Македонија. Особено Американците, кои многу вложија во стабилизирање, во реформите и во одбраната не очекуваа да се изроди вакво чудовиште. Не можам да сфатам зошто и по четири години, оваа Влада се' уште не' држи на слеп колосек“, вели Бучковски.

Деновиве и опозициската СДСМ јавно побара од Груевски повлекување на Треневски од амбасадорското место во најмоќната военополитичка организација. Во спротивно, ќе се смета дека преку скандалозното решение ВМРО-ДПМНЕ ќе ја официјализира анти НАТО и анти ЕУ-политиката.

„Ова е прва Влада што сериозно скршнува од патот трасиран за НАТО и од волјата на огромното мнозинство граѓани што се за интеграција на државата во НАТО и во ЕУ“, оценуваат социјалдемократите. (Св.У.)