ЛИЧНОСТ НА ДЕНОТ
Војчех Јерузелски
Иако воените удари се „специјалност“ на полковници и потполковници, Војчех Јерузелски ќе остане запомнет како генералот со „рејбанки“ кој воведе воена состојба во Полска на 13 декември 1981 година. Деновиве, 27 години подоцна, тогашниот генерал, кој воедно беше и ген-сек на полската Комунистичка партија и премиер, одговара за криминалот за време на неговото воено управување со Полска насочено кон политичка ликвидација на синдикалното движење кое бараше демократизација на Полска „Солидарност“ и неговиот лидер Лех Валенса.
Баксузниот 13 декември, всушност, е почеток на крајот на успешната кариера на војникот кој (1964-1968) стигна до министер за одбрана на Полска, беше „шеесетосмаш“ кој лично учествуваше во задушувањето на „Прашката пролет“ во соседна Чехословачка, а во 1970 се прослави во заговорот за уривање на „застранетиот“ комунистички лидер Владислав Гомулка. Во четирите премиерски години Јерузелски, кој во 1989 стигна до функцијата претседател, не го спречи Валенса и паѓањето на комунизмот во Полска, туку, засрамен, мораше да му ја предаде фотелјата токму нему.
Во пролетта 2006 по грешка прими и по три дена му беше одземено признание од претседателот на Републиката.
Деновиве во тек е процедура да му биде одземена и воената пензија. (Д.Ч.) |
